Sunday, April 15, 2007

الحب والصيف


أتى الصيف بمشعله
يلهب قلوب العشـاق
ويــحــرق قـلــوبـنـا
بـنيران الإشــتـيــاق


دائماً
ما يحمل لي الصيف ذكريات خاصة
ومشاعر تتولد مع شروق الشمس


الحــر يرتـبـــط بالشـمــس
والشمس ترتبط بالخصوبة
والخصوبـة ترتبـط بالجنـس
والجــنــس يرتـبــط بالحــب


كان القدماء يمثلون الحب في الإله كيوبيد
طفل عار
فالطفولة تعني الحماقة
أن الحب أحمق
لا يفـرق
من يحب
في الحب لا يوجد سبب
ولا منطق
ولا يـحمــل اتـفــاق
ولا يعـرف استثناء


وكيوبيد عار
فالعري يرتبط بالجنس
فالحب مشاعر روحية
وطاقة جسدية
ولا أظن غير ذلك



فلا ينتفي الجسد في الحب
ولا تنتفي الروح
كلاهـما موجـود
وكذلك لا تنتفي الحماقة

فمن هنا نكون جميعاً في الحب سواء

كان هذا تعليقي على
الحب الروحي والجسدي
في حديث إذاعي طويل
وللحديث بقية

36 comments:

gohayna said...

لا انفصال بين الحب الروحي والجسدي

فعشق الروح يؤدي الي عشق الجسد وهو اعلي قمه في هرم الحب
ويعلن عن اكتمال الشقين والتحامهما في روح واحده

بجد جميله طريقه التعبير

تحياتي

Haitham Abu Akrab said...

الحب اصلا
الموسم بتاعه الشتا عموما
ام الحب اللي مش بيعيش
فهو ممكن يكون ف الصيف
.
.
.
.
.
.
اما حب الصيف لو طول ممكن يكون مقدمه لحب الشتا

Anonymous said...

ههههههههه حلو تعليق هيثم هه

سيبك انت من الحاجات اللى مش جايبه همها دى
عاجبنى اوى أول صورة لكيوبيد وهو نونو كميل خالص كده

Anonymous said...

يييه اظاهر لازم أعلق لتقول عليا بقلل من موضوعك

ابراهيم
لا أؤمن بالحب الأفلاطونى

لا أؤمن بالمدينة الفاضلة

ثالوث الحب
العقل والروح والجسد

micheal said...

ايه يا عم ابراهيم الرومانسيه دي كلها
:)
تحياتي لك

heba said...

تفسير فلسفي جمييييييل
الروح مكملة للجسد والجسد مكمل للروح
والحب بقى هو التوصيلة اللي بترفرف ما بين الاتنين عشان يخليهم حاجة واحدة

أما بقى بخصوص وجيه عزيز فأنا بسمع كلام حلو كتير عن الراجل ده بس مسمعتلوش ولا أغنيه فلو ممكن يعني تبعتلي لينك لأغاني له عشان أسمعها وانتو في الحفلة وابقى كده حضرتها .. ايه رأيك ؟ وكمان سمعت انه عامل شغل حلو مع الشاعر علي سلامة فلو سمحت برده ابعتلي الأغاني اللي هي ثمار عملهم هم الاتنين مع بعض إذا أمكن .. ومعلش تاعباك معاي
سلاماتي .. احتراماتي

smraa alnil said...

الله يخربيت الاحاديث الاذاعية بتاعتك دي
انا قريت وقلت اسجل حضور

وليا عودة عشان اعرف ارد عليك كويس

يلا سلام مؤقت

Reemo said...

حب الروح والجسد وجهان لعمله واحده
فانا اوافقك الراى على ان حب الروح لا بنفصل عن حب الجسد
لكن هناك من هو ضيق النظره بالنسبه لهذه الاحاديث فيظن اسواء الظن بمن قرن حب الروح بالجسد
لكن رغم ذلك اوافقك الراى
تحياتى

محض روح said...

حب الروح دائما اوقع من حب الجسد
من الممكن ان تمل جسد
لكن لا تمل روح

بس بترجع ونسلم على ارتباط الروح والجسد
تكامل لصنع حاله ما
تعليقك جميل

تحياتي يافندم

الأرمـوطــي said...

الله يا بو خليل جميا بوست يجنن انا افكارى متفقة مع افكارك فى كل حاجة انا كمان بحب الصيف وشايف ان الحب احسن فى الصيف ولما اجى اتجوز هتجوز فى الصيف ........على فكرة اغنية فيروز جميلة جداً تحياتى ليك

Anonymous said...

مش عارفه يا ابراهيم
بس انا بحب الحب وخلاص مبقسمش انه ده يؤدى لده اوان ده مكمل لده
انا شايفاه على بعضه كده حاجه واحده وخلاص
بس البوست حلو
سلامى ليك

Anonymous said...

طول عمرى كنت مؤمنه بمبدأ أفلاطونى صميم وهو أن حب الروح هو أسمى أنواع الحب
لكن الانسان لما بيجرب حاله حب حقيقيه ..بيكتشف جوانب جديده خفيه للحب
حب الروح والجسد متلازمان..ممكن واحد فيهم يطغى على التانى..لكنهم هايفضلوا موجودين ومساندين مع بعض
كلماتك فى منتهى الرقه والبساطه

الدبور said...

أتى الصيف بمشعله

يلهب قلوب العشـاق
ويــحــرق قـلــوبـنـا
بـنيران الإشــتـيــاق

لا اعتقد ذلك
انما ياتي الصيف ليحرق جلودنا بشمسه و يحرق جيوبنا بالمصيف

شجره الدر said...

الصيف الشمس الخصوبه الجنس
الحب
عاجبنى الربط جدا
والراى عاجبنى اكتر
اه ياخواتى اسامه منير ياناس
لا احسن شويه
احاديث اذاعيه انترنتيه
هابقى اديك وسام شجره الدر من الطبقه الاولى قاهره المعز بشرطه
تحياتى

Tamer Nabil Moussa said...

انا راى ان الحب هو اساس الحياة ولاحياة بدون حب

اما ارتباط الحب ديما بالجنس انا ضدة

والا عزيزى بماذا تفسر حب الاباء والامهات هو علاقة حب خالية من اى غريزة جنسية

تحياتى

Anonymous said...

ابراهيم
ليك تاج عندى يا استاذ
ابقى عدى خده
ok
هستنى الرد
سلام:)

reri said...

تعليق رائع يا إبراهيم ... الحب كل دول.... إذا نقص أحد تلك العناصر أصبح حب ناقص غير مكتمل المعالم

سلامااااااااااات

إبراهيم محسن said...

gohayna

نورتني أول زيارة يا جميل بجد سعيد جداً بيها واتمنى اني أكون حذت اعجاب معاليكي ومنتظر مزيد من الزيارات وآسف اني اتأخرت في الرد

عشق الروح يؤدي إلى الجسد أوك لكن توجد وجهة نظر مختلفة
تقول ان الجسد يؤدي إلى الروح

الهام اننا لا يمكن ان نستغنى عن احدهما

شكراً ليكي يا فندم

إبراهيم محسن said...

هيثم ابو عقرب

منورني يا باشا
سوري لتأخيري بس اتمنى تكرار زياراتك الجميلة دي

مش عارف رأيك يحترم لكن اختلف معاك.. لأن من المعروف أن أعياد الخصوبة دائماً تكون في مواسم حصاد القمح يعني في زروة الحر

وانا اقصد ان الحب يتوهج مع توهج المشاعر الجنسية والمشاعر الجنسية تتوهج بالحرارة

عامة رأيك هفكر فيه ربما نكون متفقين دون أن ندري

شكراً يا فندم

إبراهيم محسن said...

نبيذ

هاي نبيذ إزيك؟
تعليق هيثم طبعا على دماغي رغم اختلافي معاه
:)

اتفضلي الصورة يا فندم
كيوبيد مش يغلى عليك برده

إزي رجلك صحيح؟
اتمنى انك تكوني بخير

انا كذلك يا نبيذ لا أؤمن بأي شئ له علاقة بالمثالية
ولو فيه حد مثالي في الدنيا احسن له يبعد عنها لأن الدنيا للبشر وليست للملائكة
وسيبك من افلاطون ومدينته مش هيجيبوا همهم
مدينة لم تتعدى شوية اوراق صفراء

إبراهيم محسن said...

مايكليتو

مش رومانسية ولا حاجة يا عم بس شوية احتفال بالصيف على طريقتي

سلام

إبراهيم محسن said...

شمس

هاي شموسة كيفك؟

ايه الكلام الكبير في الحب ده بس
فعلا الحب حاجة مهمة جدا كي تسمو بالجسد وتهبط بالروح الي منزلة البشر

طبعا وجيه عزيز من الملحنين والناس الفنانين الكبار جدا بس للأسف الكبار مش مطلوبين قوي اليومين دول ووللصدفة على سلامة هيكون معاه في الحفلة
:)

هديكي موقع وجيه عزيز وتعيشي فيه بقى
واسمعي بتمعن بس اقولك حاجة وجيه قوته في اللايف بجد تسمعيه لايف احسن بس اهه قضا أخف من قضا

اللينك
www.wagihaziz.com

نوري الموقع يا فندم
اوك وشكرا لاهتمامك بجد وارجو انك تستمتعي بأغاني وجيه

سلاماتي احتراماتي ابتساماتي

إبراهيم محسن said...

انجي سمرا

ماشي يا ستي ملكيش دعوة بأحاديثي عاجباني وانت مالك

:)

سجلتي حضور بس مخصوم منك يومين علشان المعاملة الجافة

مستني سعادتك

إبراهيم محسن said...

ريموو

فعلا حب الروح والجسد لا يمكن انفصالهما
انا مثلا لو هحب واحدة لورحها بس يبقى اتجوز شبح أحسن اهه روحه نضيفه مفيهاش حاجة وحشة
:)

شكراً لمتابعتك واسف لتأخري معلش الدنيا مكركبة شويتين

إبراهيم محسن said...

محض روح

طبعا لازم تتحيزي للروح هستنى منك ايه يعني؟
:)

بس مهما ارتبطنا بالروح او بالجسد فمش ممكن حاجة فيهم تزيد عن التانية والا يحصل خلل

ميرسي يا جميل

إبراهيم محسن said...

الأرموطي

مسلمي حبيبي ازيك؟

نورتني يا نجم انا كمان هتجوز في الصيف رغم اني بحب الشتا اكتر بس بإذن الله هتجوز في الصيف لأني بحس في الصيف برغبة اكتر في الحب

اتفضل الأغنية يا بيك
متغلاش على البلوج ولا عليك
:)

سلام ومتنساش الحفلة

إبراهيم محسن said...

شيماء

أهم حاجة تحبي الحب وتحبي كل اشكاله مش مهم ازاي وفين المهم تحبيه
وسا ستي سيبك من المسميات مش هتفرق معانا الأسماء

على رأي فيروز لا عرفنا اساميهم ولا عرفوا اسامينا

سلامي يا جميل

إبراهيم محسن said...

وينكي

أخيراً يا جماعه وينكي حنت عليه وجت زارتني منوراني يا وينكي بجد شرفتيني
ممكن أعرف انت برج ايه؟
اصل شكلك برج ثور قوي ولو طلع كلامي صح احب أقولك كل سنة وانت طيبة مقدما بمناسبة عيد ميلادك

كلماتك جميلة وبتأكد رأيي شكرا كبير ليكي

إبراهيم محسن said...

مسيو دبور

هاي مسيو واضح ان شمس الاسماعيلية وبحرها تاعبينك يا عم المصيف جميل وبحب أركب البتاع ده اللي اسمه طفطف حاجة جامده قوي

نورتني لسعاتك قصدي زياراتك

إبراهيم محسن said...

شجرة الدر

اهلاً بالملكة صاحبة الصولجان الفولاذي
اتفضلي الربط يا مليكتي كله من فضلة خيرك على الرعايا
:)
اسامة منير حتة واحدة كده
الوسام اللي هاخده ده أكبر شرف يا فندم
منتظر مزيد من الكلمات الجميلة دي
شكراً

إبراهيم محسن said...

تامر أبو الأفكار

تمور آسف والله عارف اني مقصر معاك بس ظروفي شوية مكركبة

رأيك يا تامر يحترم بس احب أحط تحتيه خط واتكلم عنه

بص يا تمور انت معترض على ارتباط الحب بالجنس ماشي بس اقولك ان الجنس والحب متلازمان لأن الحب روح والجنس جسد والروح والجسد لا يفترقان

أما حب الأباء والأمهات للأبناء ده أؤكد لك أنه مثال يؤكد كلامي ولا ينفيه لأرتباط الجنس بشكل مباشر بالجنس الآخر
وهسألك سؤال فوراً تجاوب
تحب أكتر تخلف بنت ولا ولد؟
انا بحب البنوتة الصغيرة تبقى حبيبة بابا
والبنت عاوزة طفل يبقى راجلها
شفت اننا مخلوقين بميل طبيعي للجنس الآخر وإلا مكنش هيبقى فيه عقده أوديب والكترا لما الحب يزيد عن حده
فالجنس لا يبتعد ابداً عن الحب حتى في العلاقات الركنية

شاكرين بجد لاضافتك اللي فتحت دماغي شوية

نورتني

إبراهيم محسن said...

شيماء

تاج؟
يعني ايه تاج؟
عامة انا هعدي وعاوز مع التاج شوية شيكولاتة اصلي بحبها قوي

تعرفي ان ده هيبقى أول تاج
يعني انتي أول من مرر لي تاجاً
نهارك مدوحس
ههههههههه
شكراً يا جميل جاي حالا
والبوست الجاي هيبقى التاج
ان شاء الله

إبراهيم محسن said...

ريري

شكراً للتأكيد على رأيي أصل بعض الآراء تختلف معي بإعتبار اني أدنس معاني الحب
بس مش في المدونين الحمد لله
للأسف بعض اصحابي
ما علينا الحمد لله ان معاني الحب تكتمل عند اي حد
حتى لو كان رأيه ان الحب ليس الا قبلة
ملناش دعوة
طيبوووووون

Sarah el eskafy said...

مش فاهمة ليه فسرت كيوبيد الطفل العارى على انه رمز للحماقة وللجنس
مع ان الطفل بيدل على البراءة والطفل العارى بالذات معناه النقاء من اى اخطاء بشرية بيرتكبها الانسان طول حياته
هو ده الحب
النقاء والبراءة
مع احترامى لوجهات نظر الجميع
الحب نوعين
حب روحى فقط
وحب روحى وجسدى
ولو فضلنا نقدم الحب الجسدى دايما فى كل كلامنا
هنفقد معنى وطعم الحب الروحى
مش هيبقى فى مشاعر ولا احاسيس بين اى اتنين
هيبقى مجرد رغبة وبس

Anonymous said...

sosa

ازيك يا سارة؟
شرفتني الزيارة الأولى

انا بحترم وجهك نظرك جداً
ونضيف للحماقة البراءة
فعلاً الجزء ده مهم
ان الحب الحقيقي براءة
أما الحب روحي فقط؟
فأختلف
لا يوجد حب روحي فقط سوى بين من لا يملكون الجسد
لا يمكن ان يكون الحب دون جسد
ولا أعتقد في ان الانسان يحيا دون جسد

شكراً لرأيك الجميل وخلينا شوية نفكر في حب الروح والجسد معاً
حب الروح فقط للمثالية
ولا يوجد انسان مثالي

Amany Y. El-Saeed said...

الله يا إبراهيم
أد إيه رأيك جميل
أنا قلت أقرا حاجه من الحاجات إللي فاتتني
:)