Friday, April 20, 2007

GUTEN TAG

صباح الخير بالألماني على الجميع
وتاج جايلنا من عند شيماء وده يعتبر أول تاج يوصلني والحمد لله أسألته كويسة
ومش من نوع الأسئلة اللي يخليك تبص حواليك وانت بتجاوب لحد من أهلك يكون شايفك ولا حاجة
انا طبعاً رغم إني كنت ناوي أحط بوست تاني خالص مرتبط بالبوست اللي الفات
بس لقيت ان التاج ممكن يكون فاصل كويس
نبدأ على بركة الله
والموبايل يلف ويلف ويقف
يشاور عليه انا
وشيماء تسأل
انت شبه مين من القادة؟
ممممممممممممم
عامة أنا مبحبش المناصب القيادية خالص وشايفها إلتزامات ــ لو فيه حد لسه بيفكر في واجباته قبل حقوقه ــ لأني بصراحة بحب أكون سندباد بلا أي ضغوط والتزامات
بس طالما ان السؤال إجباري فمضطر أفكر في قائد ممكن أكون شبهه
Martin Luther أعتقد اني أحياناً بحس إني شبه مارتن لوثر
زعيم حركة الإصلاح الديني ومؤسس المذهب البروتستانتي المسيحي
ففكر مارتن لوثر في الدين أنا بحترمه جداً لأنه حقق اللي نفسي فيه وهو التفكير في الدين والله والعلاقة بين الإنسان وربه تكون بلا وسيط
شوفتوا يا جماعة انا شبه مارتن لوثر اللي حارب أوربا كلها
؟Friends انت شبه مين من
سؤال مش هينفع أجاوب عليه لأني مش اتفرجت على المسلسل ده لأني مش بحب النوع ده من الأعمال الدرامية
إيه أكتر فيلم كلاسيكي بيعبر عنك؟
جميل قوي السؤال ده لأني بحب جداً الأفلام الكلاسيك
God Father هو أنا بحب قوي فيلم
TROY بس أنا شايف ان فيلم
أكتر فيلم عبر عن إحاسيسي وأفكاري في البحث الدائم عن الخلود أنا فعلاً يا جماعة خايف إني بعد ما أموت أكون ولا كأني كنت عايش عاوز أعمل حاجة التاريخ يفضل كاتبها للأبد
تحب تمرمر التاج دوكها لمين؟
يعني هو السؤال ده صعب شوية أصل الناس كتشير كتشير
بس نقول
ياسمين أنا حرة
محمد حسام وجهة نظر
شيماء ماشي بدون قدم
منى قهوة عالمفرق
ناقص حد؟
كفاية كده هسيب الباقين للناس تمرمر لبعضياتها أصلي لو قعدت أرص الناس كلها هقول للصبح
بس عاوز الناس اللي أنا قلت عليهم دولي ينشروا للكل همتكوا يا شباب
واللي مش هيجاوب عالتاج هعمل فيه زي الواد ده
UPDATING
----------------------
بناء على رغبة السيدة شيماء قلب وعقل وروح وبناء على فهمي الخاطئ للتاج تم التعديل
المفروض إن انا مش أجاوب عالأسئلة بشكل مباشر
المفروض إني كنت أدوس على اللينك عند شيماء وأجاوب على الأسئلة اللي تتسألي
ومن خلال إجاباتي هيعرفوا إجابة السؤال
يعني الناس اللي هتحل التاج تدوس على لينك الصورة ويخشوا يجاوبوا على الأسئلة اللي يشوفوها
وفي الآخر هيعرفوا الإجابة
أنا يا جماعة رأيي عن نفسي فوق أهوه ودي إجاباتي
أما إجابة الآخر اللي اتحددت بناء على إجاباتي فهي كالآتي
أنت شبه مين من القادة؟
ودي الإجابة
بالزمة مش كان مارتن لوثر أحلى برده
انا شبه كلينتون يا جدعان؟
بأمارة إيه بس؟
حد يقول حاجة
انا بحب مارتن لوثر
عااااااااااااااا
السؤال التاني
؟FRIENDS انت شبه مين من
وده أساساً معرفش إجابته لأني مشفتش المسلسل ده
....بس هم قالوا إني شبه

Which Friend Are You Quiz on tbs.com

مين ده؟

حد يعرف الجدع ده تبع مين؟

دي صفاتي

Your personality: Like Joey, you sometimes have trouble grasping simple concepts. But that's okay--you make up for your mental lapses by overachieving in other areas. You are the Casanova of your social set. And, no, we're not comparing you to a car made by Chevy in the seventies. You have big dreams, but low ambition, content to bide your time until your next gig comes along. And it always does.

هم اللي قالولي

لو حد يعرف الجدع ده يقولي يبقى مين وبيبيع ايه

السؤال الثالث

إيه أكتر فيلم كلاسيكي بيعبر عنك؟

وأكيد لازم تكون الإجابة غريبة كالعاده



What Classic Movie Are You?
personality tests by similarminds.com

برده لو حد شاف الفيلم ده يقولي
بس هدور عليه وأشوفه
جايز يطلع حلو
اهه حاجة نعرفها احسن من كلينتون
والواد اللي انا مش عارفه
بس تصدقوا باين عليه ابن ناس
طبعاً همرمر التاج لنفس البشر اللي مرمرت عليهم التاج فوق
والجايات أكتر
بس يا ريت مش يغلطوا غلطتي

33 comments:

shayma said...

يا استاذ ابراهيم لازم تعمل الاختبار يا فالح
اضغط على الصور الى عندى هيطلعلك اسئله وتجاوب عليها هيطلعلك بعد كده تقييم ليك نزله عندك
اتعلموها بقه هههههههههه
ماشى يا ابراهيم هستناك
:)

shams said...

مارتن لوثر مرة واحدة .. يا جامد
يارب تعمل حاجة يخلدها التاريخ عشان الناس كلها تفضل فاكراك وتدعيلك
ومتشكرة عالتاج مع اني مش عارفة هجاوب عليه ازاي بس موش موشكلة خالص
by the way "God Father" is one of my favourites
سلام

شادي فايد said...

مارتن لوثر
وانت تشبهه شكلا ام موضوعا

؟؟؟

نبيــذ said...

ملاحظة ان فيلم الأب الروحى سمة مشتركة بين الجنس الخشن

ههههههه بس أنا كمان بعشقة

استنى عليا فى التاج شوية
أصل بينى وبينك عليا تاجات كتير

و أنا مطنش
;D

أنـــا حـــــــــرة said...

ماشى يا اخويا عملته

Epitaph said...

:))

التاج ده انا مش عارفة افكر في اجوبته حتي

ده صعب يا عمنا

الف شكر عليه
:))

shayma said...

ليك تاج عندى يا مستر ابراهيم
تعالى خد نسخه
واعمله
يلا سلام

صاحب البوابــة said...

اجابتك اعجبتنى

تحياتي لك

واتمنى ان تصبح يوماً قائداً

لا شبيهاً لقائد

تحياتي

MoHaMeD HoSSaM said...

يالهوى يا ابراهيم يعنى والنبى ملقتش

غير التاج دا وتممرالهولى

مش عارف اعمل اى بس فيك

-وجه يبكى-

REEMOO said...

على فكره يا ابراهيم
انت جاوبت على التاج بطريقه صعبه جدا
هو اسهل من كده بكتير
هو اختبار وبتعمله وبتطلعلك نتيجه
بس ان جاوبت عليه من غير اى اختبارات
وده اصعب بكتير بجد
اجابتك جامده جدا
تحياتى

shayma said...

عليك نووووووووووووور
اهو كده
:D
بس تصدق اجاباتك حلوه... واجاباتك الى انت كاتبها لنفسك برضه حلوة ... متزعلش
:)
سلام

بعدك على بالى said...

يا ابراهيم .. ده مش تاج ده تدبيسة .... مكنتش اعرف ان الصحاب يعملوا فى بعض كده ... صحاب اخرزمن


بس تصدق انا غالبا لو حاجاوب حاجاوب على تاجك انت على اساس بستعبط

يالا تحياتى

محض روح said...

ليه بس يافندم
هو انا اقدر اتجاهلك

مانا دخلت وعلقت على البوست الي فات
شكلك مختش بالك
:)
وبخصوص الحفله انا شوفت الدعوه بعد الحفله
واعتذرت على عدم الحضور عندي

والتاج
ده تدبيسه
ممكن اعمل زي على بالي
واجاوب على تاجك انته ولا اكني خت بالى
;)

اصل بصراحه موضوع كلينتون خوفني

تحياتي يافندم
ومفيناش من زعل

Mony said...

حلو التاج ده يا إبراهيم...مختلف
لكن كالعادة...إجاباتك نمَت عن شخصية كشفت عنها من قبل كتاباتك

لذيذه فكرة
Guten Tag

أنـــا حـــــــــرة said...

انا عملت التاج خلاص صح بس هكتبلك النتيجه هنا بقى

أنـــا حـــــــــرة said...

القائد طلعت j.f.kenidy
و كررت الاختبار كتير كل مرة بطلع نفس الشخصية

______________

بالنسبة للمسلسل
فطلعت شبه تشاندلر

______________

بالنسبة للفيلم فانا عملته 3 مرات كل مرة طلعلى فيلم مختلف
مرة فيلم اسمه حاجه اجازة كده
و مرة الفيلم اللى طلعلك
و مرة فيلم عنف من عينة فان دام

فالسؤال ده باطل

:)

الأرمـوطــي said...

انا قلت اعدى امسى على احلى ناس
مساء الفل يابو خليل

إبراهيم محسن said...

الأخت شيماء

خلاص يا شيماء شاكرين مهللين لأفضال معاليك بس انت اللي مشرحتليش لما مرمرتي التاج ليه
تاني مرة اشرحيلي وحياة أخوكي عندك

إبراهيم محسن said...

شمس

مارتن لوثر.. شفتي بقى
يارب والله انا نفسي أقدر اعمل حاجة كبيرة
وخدي بالك بقى من التاج المعدل اعمليه وهو أسهل شوية

أكيد فيلم الأب الروحي ده من اقوى ما يمكن ان نرى في السينما
زوقت يدل على جمالك
شكراً ليكي يا شموسة

إبراهيم محسن said...

شادي

انا معتقدش اني شبه مارتن لوثر شكلاً لأن شكله مش يهمني أصلا
موضوعاً هو الأهم
موضوع مارتن لوثر لايزال قائما
أما شكله فقد واراه التراب

شكرا ليك يا كبير

إبراهيم محسن said...

نبيذ

الأب الروحي لما اتفرجت عليه أول مرة كانت عزومة بنت على فكرة
شفته سينما مع جنس ناعم
يعني مليش دعوة هي اللي قالتلي
وبطلوا تفرقة بقى
:)

التاج ده مش هيعدي على خير
وخدي بالك انا متمررلي 3 تيجان تانيين وهمررهم ليكي لما أعملهم
شفتي الشر
(o
(o

إبراهيم محسن said...

ياسمين
ايه ده؟
ده انتي مش طايقاني شكلك
:)

إبراهيم محسن said...

إبيتاف

اعملي زي ما انا عملت في الآب دايت جايز يكون كده اسهل

العفو يا جميل دي أقل حاجة
:)

إبراهيم محسن said...

شيماء

يا صباح التيجان
انتي فاضية بقى
:)

ماشي يا عمنا واحدة واحدة عليه

إبراهيم محسن said...

صاحب البوابة

أولاً نورتني أول زيارة وشرفتني ويا رب دايماً

انا سعيد بجد بكلامك ومش مشكلة في البداية أكون شبيه
فالملك يجب أن يكون خادماً كي يستطيع أن يحكم
فما حكم من لم يحكم

إبراهيم محسن said...

محمد حسام

-وجه ساخر-
انت هتنقي ولا ايه
هوده اذا كان عاجب السيادة

إبراهيم محسن said...

ريموو

خلاص شيماء السبب والله
هي مش شرحتلي أعمله ازاي
بس الحمد لله نجحت وفهمت وعملت الآب دايت
بس بذمتك
مش مارتن لوثر أحلى من كلينتون
:)

إبراهيم محسن said...

شيماء

شفتي
دي قدرات يا بنتي

الحمد لله ان اجاباتي حلوة
بس هم اجاباتهم مش مفهومة
مين كليم تون ده؟
:)

إبراهيم محسن said...

بعدك على بالي

احنا علشان اصحاب قوي لازم نشيل بعض
اصلي يوم ما ادبس حد
مش هدبس اصحابي برده؟
ولا عاوزاني أدبس الغريب؟
غريبة

انا بصراحة عجباني الطريقة الأولى
انما الطريقة التانية دي مش عجباني
أنا...شبه مين
كلينتون?
حد يقول كده؟
متنسيش الحفلة
هتيجي
ها

إبراهيم محسن said...

محض روح

انا مقلتش حاجة
التاريخ اللي بيقول
قريتي الحلقة التانية بتاعت حديث اذاعي يا هانم؟؟؟؟؟
أكيد لأ لأن تعليقك مش موجود
-وجه غاضب-

انا أخدت طبعا بالي من تعليقك البوست اللي فات
هو انا أقدر ما أخدش بالي؟
ده انا لما بشوف تعليقك بنط في مكاني من الفرحة
:)
بعد كده مفيش أعذار
الحفلة الجاية يوم الاحد 29 على الله متجيش

انت اعملي زيي انا
جاوبي الاتنين
وسيبك من كلينتون
هم اصلا بيشتغلونا في الموقع ده
هم تلات اربع صور باين بيظهروهم لكل البشر
:)

اعملي الاتنين
وانتظري
3 تيجان
في الطريق مني
بس واحدة واحدة
سلام وانا مقدرش ازعل منك
معرفش اعيش اصلا
:)

إبراهيم محسن said...

موني

ازيك يا أماني
وحشني صوتك والله
الله يكرمك انت كلامك جميل ومقدرش الاقي كلمة تناسب كلامك

guten naght
هنتظر وجودك في الحفلة

إبراهيم محسن said...

ياسمين

مممممممممم
ليه هنا؟
ليه متكتبيهاش عالملأ؟

أكيد لازم النتائج تختلف كل مرة
لأن عدد الأسئلة ودقتها بيختلف

انا لما جاوبت على 9مرة 18 مرة طلع كيندي
ولما جاوبت على 45 طلع كلينتون
ومرة طلع صدام حسين
بس كلينتون كان الأكتر
عادي كلهم قادة مش بحبهم
يمكن كيندي شوية فيه الرمق

بالنسبة للمسلسل انا مش عارف مين ده؟ مشفتوش

الافلام التلاتة مش شفتهم
بس انا بحب أفلام فان دام

ميرسي يا ياسمين لاهتمامك
ونتلاقى والتيجان الأخرى
3 في الطريق اليكي
مش تدعي عليه
:)

إبراهيم محسن said...

الأرموطي

مساء شريف عالحبايب
اشوفك بخير يا بوب
عاوزك تنورني زي المرة اللي فاتت
سلام يا عم الشباب