Saturday, March 10, 2007

نوعيات..ونوعيات

لقاء المدونين

أعزائي المستمعين جاءنا البيان التالي
في سبق انفردت به رابطة المدونين المتحدين.. تحولت الشخصيات البلوجرزية.. من شخصيات كمبيوترية مفترضة إلى شخصيات واقعية.. وذلك من خلال اجتماع مجموعة من المدونين في مقهى الإبداع الفني في أرض الأوبرا في ظاهرة اجتماعية لم يسبق لها مثيل.. وقد وصل عدد الحضور إلى أكثر من 60 مدون من الجنسين

أنا متوقعتش العدد ده بصراحة.. أنا قلت هييجي عشرين بالكتير.. بس ما شاء الله.. اتصدمت واتخضيت لما لقيت العدد ده.. وكله بيتكلم وكله بيسمع وحياة فعلاً

اليوم ده كان جامد قوي يا جماعة.. ولكن
"كم حاجة ممكن تتغير بعد كلمة "لكن
إحنا قلنا تجمع بلوجرز.. وانتوا عارفين التجمعات فيها الإيجابيات وفيها السلبيات.. هي نوعيات ونوعيات

قبل ما نقول أي حاجة.. نسأل نفسنا سؤال.. إحنا جايين ليه؟
طبعاً السؤال ده مهم.. إحنا لا عندنا وقت زيادة نضيعه.. ولا شوية شباب فاضيين.. إحنا جايين نعمل إيه؟.. بنتقابل ليه؟
والسؤال ده مربط الفرس.. لأن كل واحد عليه بنفسه يحدد الإجابة الخاصة بيه هو.. ملهوش علاقة بأي حد تاني
بجد أنا كنت رايح أقابل الناس بكل حب.. لأن الناس كلها عبر مدونتها تستحق الاحترام والتقدير الكافي.. لكن.. نرجع لكلمة لكن
لقيت للأسف بعض الناس مش جاي يقابلنا بكل حب
يعني شوية جايين يتفرجوا على أصحاب المدونات الحقيقيين لما يخرجوا من أجهزة الكمبيوتر يبقوا بني آدمين.. يعني بيتعامل معانا (على إننا مجرد حيوانات إليكترونية (سوري في اللفظ
وشوية جايين فاكرين الموضوع ضحك وتنطيط وأهه خروجة وروشنة..أه إحنا شباب وروشين بس الروشنة موجودة في كل حته.. محبكتش المرة دي
ومعلش شوية جايين يعلقوا بنات.. فاكرين إنهم علشان بنات بلوجرز يبقى سهلين.. هم بنات برضه في الأول والآخر..
وشوية جايين يدوروا على عريس.. والله مش عارف.. بس بيتهيألي إن ده مش برنامج أريد زوجاً..
أنا مش أبو العريف علشان أعرف الكلام ده.. بس سوري دي أول مقابلة ليه مع ناس أول مرة أعرفهم وجهاً لوجه.. يعني اكتفيت بالمراقبة.. يعني راقبت الناس.. وشفت.. ومعلش برده رميت وداني عند ناس كتير..لأننا للأسف منعرفش بعض بالشكل اللي يخلينا نثق في بعض ثقة عمياء..

وللأسف الشديد اللي حسبته لقيته.. يعني كان ياسمين سكي ليت وانجي سمراء النيل بينظموا اللقاء لأن العدد كان كبير.. وبجد تاعبين نفسهم وطالع عينيهم علشان ميحسسوش حد إنه غريب.. وتدخل كلمة في ودني غريبة قوي " هما مالهم واخدين الموضوع "بجد قوي كده ليه؟
ليه؟ بالذمة ده سؤال.. يعني الناس سايبة شغلها وبيتها.. وناس جاية من الإسماعيلية زي مستر دبور.. وناس راحة أسيوط.. وناس وراها حاجات كتير مهمة كل ده علشان تهيس يعني؟ هو التهييس خلص من البلد ولا إيه؟


وطبعاً حاولت أغير اللوكيشن اللي انا قاعد فيه.. لأني عاوز ناس واخده الموضوع بجد.. وبحيي الناس فعلا اللي واخده الموضوع بجد.. بس اللوكيشن التاني مكنش تمام برده.. كان فيه اتنين بيتريقوا على الناس " بص بص.. دول بيسجلوا حضور.. يعني لو أنا "مسجلتش هيخصموا مني يومين
يا راجل بذمتك ده كلام.. الناس تاعبة نفسها وبتشوف مين موجود علشان تحتفي بيه على البلوجز زي ما عمل كده مستر إيجلز وكتب كل مدونات الناس عنده في البلوج.. وتعب نفسه.. متخيل مقدار التعب اللي الراجل تعبه لما كتب ما يفوق ستين لينك بمتوسط 15 حرف للبلوج الواحد يعني ما يفوق ال700 حرف طبعاً مع كلمة دوت كوم يبقى نزود تلات حروف ونقطة.. يعني الإجمالي حوالي 1000 حرف لو كل لينك أخد منه نص دقيقة علشان يكتبه يعني حوالي نص ساعة كتابة على النت.. شفت الراجل طلع عينه إزاي.. وانت اتريقت.. مش حرام برده..؟

كمان لما بعض الناس إتكلمت عن نشاطات لينا كمدونين ممكن نتعاون ونقوم بيها.. زي إنجي لما اتكلمت عن زيارات لدور رعاية مكفوفين ويتامى أو دار مسنين.. وكمان لما أحمد فؤاد إتكلم عن حملات نقد للمساوئ اللي في المجتمع حوالينا.. كلام جميل ورائع وروح حلوة.. بس لقيت ناس بتضحك سخرية.. وواحد يقول " آه.. ونساعد أطفال الشوارع ونجيب لهم ساندوتشات حلاوة بالقشطة"
راح صاحبه رد عليه قاله " هو أنا نازل من بيتنا علشان أروح ملجأ.. ما كنا نتفق على ده عن طريق البلوجز وخلاص.. واللي كان "عاوز يروح يروح
طبعاً مش كل شوية هغير مكاني.. بس يعني شوية كلام من بعض المدونين الهدامين اللي ميستحقوش يكونوا معانا.. لقيت نفسي مضطر إني أقوم أختلط بالناس الكويسين.. لأننا قلنا إن الناس نوعيات ونوعيات..
بس انا كنت متأكد إن الناس اللي واخده الموضوع لأهداف مش تمام هيكون مصيرها إنها متجيش أي تجمعات جاية.. من نفسها هتعمل كده مش حد يعني هيمنعهم.. كمان مش هيكملوا السهرة معانا.. هيستأذنوا بدري بدري.. بحجة بقى المواصلات أو الشغل ملناش دعوة.. المهم الحمد لله القعده صفصفت واحدة واحدة.. وده مش معناه إن كل اللي مشيوا بدري كده.. لأ طبعاً.. كان فيه ناس فعلاً مشغولة.. أكيد انتوا فاهمين إن اللي على راسه بطحه.........هه؟

والغريب إننا أكيد متجمعين علشان نعرف بعض.. يعني نسمع مش نتكلم.. أكيد هعرفك لما أسمع منك مش أسمعك يعني.. بس للأسف الناس كانت بتتكلم في وقت واحد ما إديتش فرصة للآخر إنه يتكلم.. يعني ناس واقفة تتكلم وتاعبة نفسها.. وكل اتنين في وادي تاني

انا على العموم والله مش قصدي أتريق على الناس اللي كانت بتهد الموضوع.. بس بعمل رصد سريع لشوية حاجات مكنتش تمام.. أرجو إن اصحابها يعرفوا غلطهم.. ومش يعرفوا غلطهم يقوموا يتريقوا في السر من غير ما حد يسمع.. لأ ميتريقوش أصلاً.. أو ما يجوش.. واللي واخد الموضوع هزار وتنطيط معلش يخرج منه أحسن علشان ما فجرش نفسي في مدونته..

انا كنت بقرأ على مدونات الناس كلها كلام عن المثالية والنضوج وحاجات كده كبيره.. وطبعاً كنت راسم صور رائعة لأغلب الناس.. الخيال بيلعب دوره ..بس الصور دي بعضها لقيته ناقص اكتمل لما قابلت الناس.. كان بعض الناس والله أحسن مما تخيلت.. وللأسف بعض الصور الأخرى تحولت إلى شظايا كالبلور المكسور.. لقيت حاجات مختلفة وأقل كتير مما تخيلت..

أنا في البداية أتصدمت لما حصل كده.. بس ياسمين كتر خيرها فوقتني فوراً ووضحت إننا كمدونين كلامنا عن المثالية مش ضروري يكون حاجات فينا.. وقالت إن المدخن ممكن يكون بيكره التدخين.. كذلك المنافق ممكن يكون بيكره النفاق..
بصراحة كلامها فعلاً صح.. إحنا في الأول وفي الآخر بشر.. وكلنا كويسين بس بنغلط شوية غلطات صغيرة.. عادي ده طبيعي.. البشر فيهم السلبيات والإيجابيات.. لأن زي ما انتوا عارفين هي نوعيات ونوعيات..

معلش أنا اتكلمت عن السلبيات علشان أظهرها.. ولما تظهر نهزمها.. مش عاوزين الموضوع من الأول يتبني على عدم الصراحة.. مش عاوزين يكون فينا حاجة غلط نخبيها فتكبر من غير ما نحس بيها زي السرطان.. وفي الآخر نذهب كلنا مع الريح..

باقة ورد لصاحبة الفكرة ومنظمة التجمع واكتر حد بجد تعب وصوته راح آخر الليلة ياسمين سكي ليت قد إيه بجد كلها نشاط وحماس وحيوية وحب للموضوع وإخلاص شديد جداً.. بس هي عنيفة شوية.. عندها نزعة قيادية عالية تؤلها إنها تكون صاحبة منصب كبير.. هو عنفها ده يدل بجد على الصدق.. هي مش بتعرف تجامل حد.. علشان كده هي بتهاجم فوراً أي حد تحس إنه ممكن يهد التجمع الجميل ده.. ممكن تكون برج الميزان أو الجدي.. على العموم اتشرفت بيها جداً

أما إنجي سمراء النيل.. بجد بنت تحفة.. دوختني.. كلامها في مدونتها ناضج وكبير تديها أكبر من سنها.. ولما شفتها لقيتها صغنونة.. على فكرة إنجي من الناس اللي ما بطلتش تنطيط طول اللقاء.. أنا كنت فاكرها شقية.. ولما شفتها طلعت كلمة الشقاوة دي شوية.. هي مسلمتش من التريقة برده.. خصوصاً لما كانت بتاكل شيكولاته.. انا اتريقت عليها لأني كانت عيني في الشيكولاته.. للأسف أكلتها وأكلت عيني معاها

من الناس بجد بقى اللي مدخلتش على مدونتهم خالص بس انبهرت بيه كان استاذ احمد شقير.. من الآخر كبير القعده ومن الناس اصحاب الأفكار الجميلة..

أما هاني جورج ده حد جميل قوي وكلامه كبير.. صاحب فكر عالي وحماس.. وكان ليه حضور طاغي في اللقاء.. هاني شدني فعلاً وهنبقى اصحاب.. يعني لو هو يحب..

تامر بقى أبو الأفكار ده فظيع جداً.. اللي يقرا أفكاره يخاف منه.. بس لما شفته لقيت إبتسامة طفولية جميلة على وشه.. شدني بجد إني اتكلم معاه كتير.. خفت منه لما عرفت إنه مراقب أمن.. بس الحمد لله طلع قطاع خاص..

للأسف بسبب إن الناس كانت كتير معرفتش اقرب منهم كلهم.. وكان نفسي اقرب من راسبوتين والدبور على الأخص.. اصل الاتنين حسيت انهم فيهم من بعض.. خاصة الدبور اللي عمال يزن طول القعده.. قومت طيرت بعيد عنه لا يلسعني ولا حاجة..

محمد مصر هي أمي من الناس الجامدين برده.. شاب جميل وصاحب قبول عالي
وإبراهيم غيري كان موجود.. وكمان مش جاي لوحده جه معاه كمان.. حد زي العسل. بس للأسف فيه إبرهيمين غيري

وكذلك من الاطفال قد حضر المدون الصغير محمد ــ أحياناً عمر ــ صاحب مدونة "عيل شقي" مع شقيقه آدم المصري ــ على فكرة اسمه الحقيقي احمد ــ رغم إني حسيت إن احمد هو اللي جه مع محمد.. على فكرة محمد كبير قوي يا جماعة ومش عيل شقي.. ده مصيبة.. لدرجة إن البنات بتعاكسه.. حتى البنت سمراء النيل إنجي كانت بتعاكسه بس هو نفضلها.. شفتوا التقل..

بجد انا مش عارف اتكلم عن مين ولا مين.. بس بجد انا اللي متكلمتش عنه مش تجاهل مني.. بس بجد كان صعب أحتك بالناس كلهم.. وصعب برده إني أجامل.. لأن سهل أكتب اسماء الناس كلها وارص كلام.. بس مبعرفش أعمل ده خالص..

بجد اللقاء كان جميل.. قلت سلبيات وإيجابيات.. لأن الناس نوعيات ونوعيات.. ومش مهم.. المهم نكرر اللقاء.. لأن الموضوع جميل.. ولأول مرة احس فعلاً إن فيه ناس بتحب بعض حب منزه بعيد عن المناظر السطحية أو المصالح.. لأننا كلنا اتقابلنا من غير ما نعرف عن بعض حاجة غير روح كل واحد عبر عنها في مدونته.. يعني من الآخر حبينا بعض حب مجرد.. أفلاطوني.. ادعوا معايا إننا نهزم السلبيات ونكبر الإيجابيات.. لأن الناس زي ما قلت نوعيات.. ونوعيات..

64 comments:

Gid-Do - جدو said...

عزيزى ابراهيم

انا كنت عاوز اعرف اية اللى تم فى لقاء المدونين ولقيت اللينك دة
مصر هي أمى حاطط عناوين المدونيين اللى حضروا اللقاء وقعدت اعمل قص ولصق لكل عنوان بهدف انى الاقى حد كاتب عن اللقاء ـ اخت وقت طويل فى القص واللصق ولقيت كام واحد كاتبين ـ بس مفيش حدغيرك كتب وصف خلانى احس انى كنت هناك ـ فحبيت احييك واشكرك على جديتك وشرحك وتحليلك لما دار هنا ـ ناوى اتصفح مدونتك على رواقة ـ تحياتى

karakib said...

أبراهيم كلامك أخجلني بجد و شكرا جزيلا لكلامك الجميل ده عني
أكيد أحنا أصحاب علي فكرة واضح أنك كنت متابع اللقاء كويس و قدرت تنقله جزء جزء زي ما العزيز جدو بيقول فعلا

مصر هى أمى said...

ابراهيم
اول حاجة متشكر جدا على اللى انت كاتبه عنى

انا هاقولك نفس الكلام اللى انا كتبته عند الدبور
احنا فوجئنا بالعدد ده وطبعا صعب جدا انك تسيطر على ناس كتير وخصوصا ان فى ناس مكنتش جايه لوجه الله لكن اهه فسحة وتيجى تشوف وشوش جديدة وخلاص طبعا كلامك فى غضب كبير لايق فعلا على اسم مدونتك من الناس اللى ملهاش لازمة انها تيجى
عموما هنحاول ان احنا نظبط الناس فى الاجتماع اللى جاى

ابراهيم انت شخصية كويسة جدا وياريت نبقى اصحاب

أُكتب بالرصاص said...

اخونا الفاضل
ابراهيم

انا كنت متشوق اعرف ايه الي حصل

ولاقيت
افضل وصف عندك

جزاك الله خيرا

لاهتمامك
ولقلبك على الانتفاع بهذا التجمع


وياريتني كنت معاكم



جدو العزيز
تحيات عابرة للقارات

الدبور said...

قلت كده بس بأسلوب شديد شوية فاهاجوا كلهم ضدي
كنت اتمني اكتب البوست بنفس اسلوبك الهادي
بيني و بينك اصل انا كتبته و كنت لسه راجع البيت ودمي محروق من اللي كان بيحصل من بعض المدونين القلائل فعلشان كده ظهر البوست بالمنظر ده

MAKSOFA said...

بجد شدني وصفك الي قراءه البوست بتمعن وأستطعت نقل مادار بشكل جعلني أحس بتواجدي في هذا التجمع

micheal said...

ابراهيم
أحييك علي جرئتك فيما كتبت لاني كنت من الحاضريين للقاء و قد أسعدني في بدايه حضوري وجود مثل هذا العدد الضخم و لكن بمرور الوقت بدأت ألاحظ حاجه اللقاء الضروريه لمزيد من التنظيم...أنا عن نفسي بما أني كنت من بين المدونيين الذين حضروا اللقاء السابق فقد رحبت في بدايه حضوري بأصدقائي المدونيين الذين تعرفت عليهم من المرة السابقو و غيرت مكان وقوفي أكثر من مرة و ذلك محاوله مني للتعارف و التواصل مع اكبر عدد من المدونيين و لكن لم يحالفني الحظ لللتعرف عليك و لكني تعرفت علي ادم المصري و تامر و طبعا الطفل المعجزه أخو ادم المصري...بس بصراحه أكتر حاجه عجبتني في اللقاء لما انجي قامت اقترحت فكره مساعده أطفال الشوارع و المكفوفين..حسيت وقتها أن ده حيكون أكبر تفعبل للقائنا كمدونيين و ساعتها حنحس أن تجمعنا الكبير ده فعلا بقاله قيمه كبيره و أصبح مؤثر في مجتمعنا بشكل ايجابي
تحياتي لك و أتمني التعرف عليك عن قرب في لقائنا القادم

zenzana said...

أنا جيت من عند جدو
خضت نفس تجربتك
قابلت زملاء التدوين اتصدمت في ناس وتوثقت علاقتي بناس لكن في النهاية قررت ان اسيب الفضاء الافتراضي للفضاء الافتراضي لانه زيه زي اي فضاء مليان بكل انواع البشر

Hannoda said...

أنا سعيدة اني أخيرا لقيت حد كاتب عن أحداث اللقاء بشكل حسسني كإني حضرته

لفيت على أعلام اللقاء .. طبعا ياسمين و راسبوتي 0أيمن9
وروحت عند شادي فايد
لقيت صمت قلقني بشده و حسيته بمثابة غضب
وإتأكدت لما زرت دبور

أنا بشكرك جدا على كلامك

طبعا لازم تحصل مواقف زي ده في البداية..

لازم كل النوعيات و كل الشخصيات تروح و تشوف الجو

وبما إن الطبع الغالب ع الجو العام هو الثقافة و الأفكار المحترمة و التعاملات الراقية فالعناصر الشا>ة حاتنسحب زي ماقلت بالضبط

أنا مقدرة غضب ياسمين .. ده ان كانت غضبانة .. وكمان حزن دبور اللي بان في البوست بتاعه

لإن التجربة رائعة و القائمين عليها مابيهزروش.. وأكيد شيء بالقيمة ده لازم يتخاف عليه

اللقاء شيء رائع و متأكده إن كل أفراده اللي بنحترمهم جدا مش هايتخلوا عنه

وبجد بشكرك على الصورة الواضحة اللي قدمتها في البوست الرائع ده

ومعلش ع الاطالة

عباس العبد said...

انا مش عارف انت اتصدمت ليه
هما البلوجرز دول ملائكة
ما لازم تلاقى الكويس و الوحش
دى حاجة طبيعية
و لازم تلاقى الى بيكتب حقيقى من جواه
و الى بيصطنع الكتابة و هو مفهوش اى حاجة من الى بيكتبه
انا كان نفسى اجى و الصراحة انا مكنتش اعرف ..
قريت بس عند كراكيب و مكنتش اعرف انها دعوة عامة
بس تتعوض فى اللقاء الجى

ياسمين said...

شكرا على البوست الرائع دة .. انت اتكلمت وقلت كل اللى كنت عاوزة أقوله

وعلى فكرة انا فعلا برج الجدى

وانت قلت المفيد فى الآخر والنتيجة هى انى مش هاهتم بأى حد كان جاى يهرج .. عارف ليه؟؟؟ عشان هم مش هييجوا تانى كدة كدة .. صدقنى .. أنا ناشطة اجتماعية فى الأصل وندوات الأمم المتحدة نفسها والمؤتمرات الدولية بيكون فيها ناس زى دى برضه

اشكرك .. اشكرك .. أشكرك لأنك كتبت النقد المهذب البناء بحب حسيته بين السطور .. وعلى طول معانا انشاء الله يا ابراهيم .. وانت من الناس اللى أنا سعيدة انى اتعرفت عليهم فعلا

تحياتى

tamer said...

ازيك ابرهيم

اخبارك اية

كلامك تمام وزى ما انت عارف مفيش حد مثالى

رغم وجود البعض كان مش ادى المسئؤلية كان فية اللى عارف اهمية اللقاء والاهداف القيمة منة


وانا شايف ان الاغلبية كانت وخدة الموضوع على محمل الجد ومبسوطة جدا بالتعارف والفايدة اللى هتعود علينا من اللقاء الرائع دة اللى لايقلل من اهميتة وجود بعض الخارجين عنة والاهداف المحددة منة وكما تعلم ياصاحبى لكل قاعدة شواز لاتلغى ولاتؤثر على القاعدة الاساسية


انا سعيد جدا بمعرفتك
وان شاء الله نتقابل فى اللقاء القادم


تحياتى

nadine said...

ابراهيم

للأسف انا كنت واحدة من اللى مشيوا بدرى
و ذلك لظروف طارئة خارجة عن إرادتى
و مع إنى مالحقتش اقعد للأخر
بس حسيت كل كلمة انت قلتها

بس عارف
انا بصيت للموضوع نظرة تانية
لقيت انه دى كلها سلبيات صحيح
بس احنا لسة فى اول المشوار
و زى ما انت قلت
اللى ماكانش جاى عشان اللقاء
معتقدش انه هيجى تانى

و فعلا ياسمين و سمرا عملوا مجهود جبار لإدارة اللقاء
و انا متأكدة ان المرات الجاية هتبقى احسن
لأن بجد بعيد عن كل المظاهر السلبية دى
كان فى حاجات حلوة بينا بتجمعنا

مبسوطة قوى بنقدك ده
سلامى ليك

MoHaMeD HoSSaM said...

عجبنى البوست وهدوءك فى الوصف واشكرك مرة تانية معلش انا طاهقتك شوية وكل شوية كنت بقول "انظر حولك فى غضب "ازى يعنى بس انا اتبسط انى اتعرفت عليك وكان تواجدك فى اللقاء شى جميل بجد

Bella said...

موضوع جميل جدا وطريقة الوصف جعلتني اشعر انني كنت موجودة

ماحدث امر طبيعي جدا خاصة في وجود عدد كبير من الاشخاص الذين يتعرفون بشكل مباشر ربما لاول مرة
فالحياة الافتراضية على النت مختلفة عن الطبيعية المباشرة

لاتنسى انك تتعرف على افكار الناس عن طريق مايكتبون ولا ترى باقي العوامل التي توطد علاقتك بهم كطريقة كلامهم مثلا او طريقتهم في الإصغاء وغيرها من الاساليب التي تساعد في رسم الملامح وليس الكتابة فقط.

كل التجمعات التي تنتقل من النت لارض الواقع يحدث فيها هذه الامور وربما اكثر

ربما كان هذا هو السبب الذي لم جعلني اتردد في الحضور

وفي كل الاحوال احييك على طريقتك الراصدة

فعن نفسي عندما يحدث لقاء من هذه اللقاءات اشعر اني اتفرج واراقب اكثر لاتعرف على الناس اكثر

hend said...

حلوة اوى فكرت لقاء المدونين
وانت عندك حق طبعا انها حاجة تزعل انكم عاملينها لهدف وناس جاية تتفرج او تدور على اشكال هو شئ مخجل بس لكل تجربة اخطائها وسلبيتها واكيد ليها برده ايجابياتها

أميرة البلطجية said...

اه طبعا كان لازم تتوقع كده
في كام مدونة مصرية ع النت دلوقتي يا ابراهيم..وانت عارف ان النت والعلاقات بين الناس من خلالها لا تزال لغاية دلوقتي مش مأخوذة على محمل الجد حتى من كتير من النتاوية نفسهم
عموما اللقاء ده فيه ميزتين
اولا انه عرف الناس الكويسة على بعض
التانية ان عرف الناس الكويسة ان فيه ناس غير جادة ..مش غير جادة في التدوين..لأ..كل واحد حر..لكن غير جادة في وجهة نظرها للبشر التانين
ودي حتبقي نقطة ان شاء الله حتحطوها في الاعتبار في الاجتماع الجاى
:)
تحياتي

إبراهيم said...

جدو

مين قال إنك جدو.. الكلام شباب قوي سعدت بتشريفك مدونتي بجد هي نورت.. ومتشكر إن وصفي للقاء عجبك.. وكل الناس اللي اتكلموا عن اللقاء اتكلموا بكل حب.. بس منهم من كتر غيرته على الموضوع الناس زعلت منه.. زي مسيو دبور..
المدونة تنور بوجودك دايماً والله.. وانا بجد اتشرف لما آخد شوية من وقتك

إبراهيم said...

هاني كراكيب

نورت يا هاني والله.. احنا فعلاً إصحاب جامدين قوي ودي حاجة تسعدني بجد وشرف ليه لأنك صاحب دماغ وعقلية كبيرة.. وانا سعدت بوجودي في اللقاء لأني اتعرفت على واحد زيك..شرفتني

إبراهيم said...

محمد مصر هي أمي

والله الكلام ده أقل حاجة أقولها عنك.. كفاية يا راجل إنك استحملت رغيي طول اللقاء..
أخيراً حد فهم معنى اسم مدونتي الغضب.. بس والله أنا مش غضبان من اللقاء ولا مستاء منه.. اللي حصل ده شئ طبيعي جداً لتجمع زي ده.. ومتقلقش الناس اللي واخده الموضوع هزار هتفرقع منه بدري بدري
أنا والله اتمنى انك تقبل صداقتي.. اعتبرني أخوك في المدونة

إبراهيم said...

الاستاذ اللي بيكتب بالرصاص

كلامك ده ميتكتبش بالرصاص.. ده يتحفر بالنار على ألواح من ذهب.. شكراً لإطرائك الجميل
يا ريتني كنت معاكم دي فكرتني بفيلم الطريق إلى إيلات.. يا سيدي تتعوض المرة الجاية.. نتشرف بيك وسلامي معاك لجدو

إبراهيم said...

مسيو دبور

غيرتك على الموضوع يدل على حبك ليه.. أكيد إنتقادك للحاجة اللي مش كويسة أحسن من الناس اللي عملوا حاجات مش كويسة.. أنا معرفش انت كتبت إيه بالظبط لأني دورت ملقتش.. بس مهما يكن اتمنى الناس اللي زعلت منك تقدر تعبك وغيرتك على الموضوع.. ده انت جيت من الإسماعيلية مخصوص ياراجل مرتين وكمان معالك صاحبك الدكتور.. والله انا متأكد إنك حابب الموضوع ومش جاي تهرج.. بس برده الناس اللي زعلت منك أكيد برده اصحابك وعاتبين عليك.. والعتاب هدية الأحباب.. أوعى تزعل من حد منهم وصالحهم بكل هدوء.. يا جدعان إحنا لسه في البداية هنزعل من بعض
مسيو دبور اتشرفت بيك واتمني إنك تزورني كتير.. واشوفك اللقاء القادم بإذن الله وانت مبتسم ابتسامتك الجميلة دي كعادتك.. صافي يا لبن

إبراهيم said...

مكسوفة

انا مش هفتش أسرار اللقاء بس أحب أقولك إنك كنتي والله محور حديث طويل بين أصحاب المدونات في اللقاء.. ده يدل إنك ليكي حضور عند الناس..اتكلمنا على مدونتك كتير.. انا مكنتش أعرفها في البداية.. بس شدني الكلام إني أعرفها.. وأكيد هتلاقيني من زوارك كتير.. اتشرفت بزيارتك والمرة الجاية ياريت تنورينا

إبراهيم said...

مايكل

الزحام لم يتح لنا التعرف عن قرب أكثر.. بس انا شفتك وانت بتتنقل بين الناس.. مش فاكر شكلك قوي.. بس اسمك علق معايا.. ويا سيدي اللقاءات جاية كتير بإذن الله.. إتشرفت بيك واتشرف بيك أكتر لما أعرفك أكتر

إبراهيم said...

زنزانة

نورتي يا مس زنزانة.. ونفس التجربة كلنا مرينا بيها وكلنا حسينا بيها.. مع إختلاف أماكن تواجدنا.. وعادي متتصدميش قوي.. طبيعي اللي حصل.. واللقاء كان ممتع وظريف.. بس أكيد الحلو ميكملش.. اتشرفت بيكي بس أنا متعرفتش بيكي في اللقاء للأسف.. أرجو إنك تكوني موجودة اللقاء القادم وميأثرش فيكي السلبيات لأن زي ما فيه سلبيات فيه إيجابيات.. لأننا زي ما إحنا عارفين.. الناس نوعيات.. ونوعيات

إبراهيم said...

Hannoda

وانا سعيد إن مدونتي نالت الحظوة عند سعادتك.. انتي لفيتي فعلاً على أعلام اللقاء..بس الكلمة دي خضتني بجد

لقيت صمت قلقني بشده و حسيته بمثابة غضب

أنا خايف فعلاً تكون الناس مخنوقة.. وده هيكون أول مسمار يتدق في نعش صحبتا الجميلة.. ومسيو دبور مش زعلان من اللقاء قد ما هو زعلان من رد فعل الناس ضد كلامه عن اللقاء.. وانا بجد اتمنى إن الناس تعذر بعض.. لأننا لسه ما نعرفش بعض قوي.. مينفعش آخد إنطباع سريع أو أزعل من حد لمجرد كلام في لحظة غضب.. لازم نكون أكثر نضوج من كده
اخاف فعلاً تكون الناس زعلانة.. هي زوبعة دهشة وترقب سريعاً ما تزول.. وياسمين طبيعتها كده.. أخيراً جبت جون وعرفت إنها برج الجدي.. خدي بالك ياسمين من النوع اللي ممكن يغضب بسرعة ويهاجم الناس.. بس مش كل الناس.. الناس اللي مش زي الناس.. بس هي برضه من الناحية التانية رقيقة وهادية مع الناس اللي ناس بقى
كل الناس محترمة وعلى عين وعلى راس بعض.. بس اتمنى إن حالة الصمت والترقب والدهشة والصدمة دي تزول بسرعة.. لأن الموضوع بجد تحفة جداً وياريت نكمله..
ومستوحى من فيلم الطريق إلى إيلات برده.. لو الكل رجع أنا مش راجع.. هاخد لغم وأفجره بإديا.. وبشرفي لا أعملها.. قصدي.. هكمل المشوار للآخر.. بس أنا متأكد إني مش هكمله لوحدي أبداً
يا ستي طولي براحتك.. كلامك جميل
شرفتيني

إبراهيم said...

عباس العبد

يعني الصدمة كانت من الزحمة أولاً.. ثانياً أنا برده بشر وبحس وبانفعل ومش هكدب عليك إني بحب الناس دي بجد.. وصعب إنك تحب وتتصدم بسرعة كده
انت من اصحاب هاني كراكيب.. طيب خد بالك ده صاحب جامد قوي أنا قابلته على الهواء مباشرة.. والمرة الجاية لما تيجي هتعرف ده..شرفتني

إبراهيم said...

ياسمين

انتي اللي والله رائعة.. وحماسك اللي كنتي فيه ليلة اللقاء خلا ناس كتير من اللي كانوا جايين يهرجوا يتكسفوا شوية على دمهم.. وكمان كفاية إنك فوقتيني لما اتصدمت في اللقاء..
أكيد كلامي هو نفس الكلام اللي كان نفسك تقوليه.. ما هو أنا برج الجدي برده.. ههههههه
بس هتفرق أنا برج الجدي شهر ديسمبر وانتي أكيد يناير.. وبطبعتك الجميلة الصريحة دي كنتي هتدمري الناس بكلام من القلب زي الصواريخ

أنا مصدقك.. حسيت من اسلوبك إنك خبيرة في مواضيع الجمعيات دي.. وهتلاقيني قايل ده في البوست.. أكيد محدش من الجماعه الهدامين هييجي تاني.. لأنهم مبيحبوش يدوا شوية وقت لحاجة مفيدة.. هم الخسرانين

انا والله اللي سعيد بتعرفي عليكي وسعيد بكلامك وسعيد جداً بحماسك لأني كنت خايف إن حماسنا يقل.. بس واضح إنه بيزيد.. كلامنا بيقول إن حماسنا بيزيد.. زعلنا وغضبنا وغيرتنا بتقول إن حلمك يا ياسمين وحلمنا كلنا إبتدي يكبر ويخرج للنور أكتر.. أنا سعيد بالحماس ده.. بس ليه عندك طلب أكيد إنتي عملتيه من نفسك.. مسيو دبور زعلان قوي.. وهو والله مش حد يستاهل منا إننا نزعله.. اتمنى انك تصالحيه وتفهميه إننا مش زعلانين منه خالص.. وإنه من الناس المخلصين للموضوع وده إحنا متأكدين منه.. هو أكيد هيسمع كلامك.. أنا حسيت من اللقاء إنكوا اصحاب قوي.. ياريت تصالحيه.. أوك

إبراهيم said...

تامر

تمام يا تمور مفيش حد مثالي وأغلبية
الناس كانوا ناس زي العسل وسيبك من الأقليه.. أكيد هم قريوا كلامنا وعرفوا غلطهم وعرفوا إننا مش معلقين سكاكين لحد.. اتمنى انهم يغيروا نفسهم ويكونوا معانا.. أكيد هم برده ناس كويسين بس محدش مبيغلطش..
أنا سعيد أكتر بمعرفتك.. وإن شاء الله هنتقابل في لقاءات كتير

إبراهيم said...

نادين

كنتي موجودة معانا؟
يا خسارة متعرفتش بيكي.. أكيد شفتك بس الاسم معداش عليه.. بس تتعوض في لقاءات قادمة.. كلامك تمام وبإذن الله المشوار هيكمل من غير نهاية.. هنبقى أجمد مدونين في الدنيا.. أنا مبسوط أكتر باهتمامك بقراءة الموضوع.. واتمنى تكرار الزيارات..

إبراهيم said...

محمد حسام

ياراجل لا طهقتني ولا حاجة.. دا انت شرفتني واتمنى إنك تكون عرفت أخيراً يعني إيه " أنظر حولك في غضب" وانت اللي انسان رائع وجميل.. نورتني

إبراهيم said...

Bella

يا ستي كنتي موجوده برده.. كفاية إنك اهتميتي تعرفي إيه اللي حصل.. ياريت تبقي معانا المرة الجاية.. أكيد تعارف الأشخاص عبر شبكة من الموجات يعتبر عالم مختلف ومفترض وخيالي.. ومهما يكن هو لن يصب الواقع بالصحة أو بالخطأ.. هو مجرد عالم مفترض..
أنا بشكرك على زيارتك المشرفة.. واتمنى إنك تكوني معانا في اللقاءات القادمة..ومتكتفيش بالمراقبة عبر المدونات

إبراهيم said...

هند

الفكرة مش مجرد فكرة حلوة.. دي فكرة رائعة وجميلة أتاحت لينا أننا نشوف عوالم جديدة ونرتبط ببعض أكثر.. والسلبيات مش هي البترينة اللي تعبر عنا.. اليوم كان جميل ورائع.. والسلبيات مجرد سلبيات وزي ما فيه سلبيات في إيجابيات.. لأن الناس زي ما إحنا عارفين.. نوعيات و نوعيات

إبراهيم said...

أميرة البلطجية

جامد جداً كلامك عن التدوين الجاد والتدوين غير الجاد.. كلامك ده فتحلي آفاق تانية وفهمني حاجات كويسة هاخد بالي منها قوي.. فعلاً الناس اللي مش جد في تواجدها.. أكيد مش جد في تدوينها.. الناس تاخد بالها يا جماعة..
إن شاء الله الإجتماع الجاي هيبقى أحسن بإذن الله.. وشكراً لحضورك الرائع..

إبراهيم said...

للناس الكويسين اللي تعبوا معانا وخدوا الموضوع بجد


والله أنا بجد فرحان إن الناس حبت الموضوع أكتر.. بس خايف نقف بسبب شوية زعل ولا شوية سلبيات ممكن نتغلب عليها.. لازم يا جماعة نجمد ونشد إيد بعض وما نتعاملش بحساسية.. نستحمل شوية معلش.. الموضوع يستاهل..
بجد أرجو ان الكل يطير ويروح لمسيو دبور ويصالحه ويفهمه إننا مش زعلانين أبداً منه.. لازم يا جماعة نقدر غيرته على الموضوع.. وكفاية إنه اهتم يصالح الناس.. ارجوكم متزعلوش من بعض

إبراهيم said...

للناس الكويسين برضه اللي ما خدوش الموضوع بجد


بصوا يا جماعة.. والله لولا إننا بنحبكوا مكناش اهتمينا نقابلكوا ونعرفكوا.. كلنا حبين بعض.. يبقى لازم نعرف بعض أكتر.. علشان نعمل حاجة تتحسبلنا في السماء وفي الأرض..
كل ابن آدم خطاء أكيد ومحدش فينا يا بشر إتخلق من غير نقص.. إحنا مش ملايكه.. ومش ممكن نحاسب واحد على إحساس حسه أو غلط عمله.. نحاسبه بس في حالة واحدة.. لو كان عارف غلطه وكرره وتمادى فيه أكيد اللي غلط منكوا عرف غلطه.. أو يمكن إحنا اللي غلطانين ومفهمناكوش كويس.. اتمنى المرة الجاية إنكوا تكونوا معانا والله بس تسيبوا غلطكوا في البيت قبل ما تيجوا.. واللي فات مات..
واللي عرف غلطه ونسيه على عينا وعلى راسنا ونرفع له القبعات.. أما اللي هيتمادى في الغلط معلش مش مستعدين نهد الموضوع علشان أي حد.. يبقى اللي هيحاول يهد بجد هنقفله كلنا.. وده علشان المصلحة العامة.. وتصبحوا على خير

إبراهيم said...

شكر خاص لاهتمام استاذ جدو الراعي لبلوجي.. لأنه ادرج لينك المدونة الخاصة بي في بوست منفرد في مدونته..واعطاني مساحة جميلة من الإهتمام اللي أخجلني واسعدني في نفس الوقت

شكراً ليك يا جدو يا عظيم شكر عابر للقارات منين ما تكون تقديري ليك هيوصلك.. مهما اقول مش هعبر عن سعادتي ومش هرد اللي عملته لأجلي ولأجل كل المدونين لأنك إهتميت تعرف تفاصيل اللقاء .. وبجد كان نفسي تكون في مصر علشان نقابلك ونتشرف بيك

اتمنى انك تزورني كتير

3ashe2elro7 said...

يمكن اول مره ادخل عندك يا فندم بس كنت عارف باللقاء ده من مدونه تانيه بس اللى حابب اقوله ان كل مكان فيه الحلو و فيه الوحش فيه اللى داخل علشان هدف و عايز يعمل حاجه و اللى داخل علشان حياته هلس و مش ناوى يغيرها حتى لو كان اللى فيه ده ايه
بس برده بيتهيألى ان الناس الكويسه كانت اكتر من الناس التانيه اللى جايه تهيس
اتمنى تزورنى فى مدونتى ..هتلاقى حبه ناس غلابه معايا على اليمين و انت داخل شوفهم برده .. ممكن نعجب .. بنعتقد اننا ناس ممكن نكون كويسين .. مستنى رأيك
قريت البوست اللى قبل ده بجد حوار صعب اوى و موقف البنت دى فظيع اعتقد انها بتعيش اتعس لحظات الحياه .. بجد موقف صعب اللى اتعرضتله
و السلام ختام

محمد ياسر said...

اه مهو السلبيات موجودة بس خلى بالك ده يعتبر اول لقاء بتجمع كبير كده 60 مدون و كان لسه لخبطة كده و الناس لسه بتعرف بعضها اصلا لكن بعد كده بيبقى الموضوع احسن وكل مرة بيكون احسن من اللى قبلها و لو ناس بتتريأ اكيد مش هتيجى تانى او تلاقيه هزار يمكن

و انا اتشرفت بمعرفتك يا ريس

إبراهيم said...

عاشق الروح

نورتني يا باشا.. وانا معتبرش دي أول مرة دي مرة بالدنيا

الناس كلهم كانوا كويسين حتى اللي كانوا بيهيسوا.. لأنهم حتى لو غلطوا بإذن الله هيتعلموا

طبعاً لازم اجيلك مدونتك ده كلام.. من غير ما تقول دي الدنيا تضحكلي لما أعمل كده واصحابك الغلابة دول في عيني والله وكلكوا ناس زي الفل

جميلة بنت لذيذة نفسي تعيش حياتها بقى وتخرج من عالمها المغلق وتصوراتها المتحجرة.. موقفها فعلاً صعب بس مواقف ناس كتير أصعب وبيعدوا منها..إدعي لها

والدعاء ختام

إبراهيم said...

محمد ياسر

مش انتى برده حدوته مصرية؟؟
يا عمنا كل شئ يهون قدام التجمع اللذيذ ده أنا شايف زي ما يكون انت بتعتذرلي مش عارف ليه؟

أوعى تكون من الناس اللي اتريقت..يا عمنا انا أكيد مش زعلان ده انا فرحان بتنطط بس الحياة بقى خلتني أنظر لما حولي في غضب.. يمكن ينصلح حال ما حولي..والناس تمام وهزارها على عيني وعلى راسي.. بس مش شايف إنه تقيل
شويتين؟

يا عمي أنا اللي اتشرفت وشكراً جزيلاً والسلام آخر كلام

hosnysoliman said...

ابراهيم باشا ياريت كلهم زيك عندهم القدرة على رؤية الايجابيات والسلبيات المشكلة ان عين السلبيات عندنا هيا اللى شغالة وعين الايجابيات خرقنها وبقت بتشوف نفس صاحبها بس .اشكر لك هذه الرؤية الجميلة وباذن الله يكون فيه لقاءات قادمة

بعدك على بالى said...

مجتمع التدوين (افتراضى او واقعى) جزء من المجتمع بكل اللى فيه، انا شخصيا مش مصدومه..

اعجبتنى صراحتك بشدة وقدرتك على التقاط التفاصيل .. أيضا نقلك للقاء كان اقرب للبث المباشر...

تحياتى

Epitaph said...

نقد هادئ للوصول الي الافضل

ان شاء الله يتم تلافي الاخطاء المرة القادمة...:) تحياتي لكم جميعا

علي فكرة نقلت الموضوع باسلوب جميل
كأني حضرت معاكم

إبراهيم said...

الفنان حسني سليمان

يا ابو التفانين منورني والله ده شرف ليه إنك دخلت مدونتي المتواضعة.. وتواضع كبير منك.. أنا كان نفسي يوم اللقاء اتعرف عليك بس زي ما انت شفت بقى العدد كان مش مساعد إني اتعرف على الناس كلها بس أنا برده شفت اللوحات الجميلة اللي كنت جايبها معاك..يعني إتعرفت على لوحاتك
والمرة الجاية بإذن الله نقرب من بعض أكتر

والله عين الإيجابيات شغالة زي عين السلبيات برده بس معلش لما الواحد يبقى متعصب وغيران ناحية حاجة معينة مبيشوفش غير السلبيات علشان هو عاوزها كاملة

تمام زي لو فريق كورة لعب ماتش حلو وانتى بتشجعه.. الفريق بيلعب حلو بس للأسف فيه شوية سلبيات أدت لخسارته.. بيتهيألي كلنا كلامنا هيبقى على السلبيات

كلامك جميل ونابع من روح فنان حقيقي والمرة الجاية أشوف حضرتك مع لوحات جديدة بقى..والسلام آخر كلام

إبراهيم said...

بعدك على بالي

أفهم من كلامك إنك كنتي موجودة في اللقاء.. أنا بزعل جداً لما آلاقي ناس كانت في اللقاء ومتعرفتش عليها..معلش تتعوض

أنا مش مصدوم ولا حاجة أنا كنت هتصدم..بس ياسمين لحقتني..الحمد لله

ـــــــــــــــــــــــــــ
اعجبتنى صراحتك بشدة وقدرتك على التقاط التفاصيل .. أيضا نقلك للقاء كان اقرب للبث المباشر...



يا جميل ده إطراء كبير عليه مقدرش عليه.. إحنا من البداية اتفقنا نتقابل علشان نعمل حاجة تكون كويسه.. ولو مبدأنهاش بالصراحة يبقى أحسن منتجمعش تاني.. لأن عدم الصراحة تؤدي إلى إختلال العلاقات.. والعلاقات المختلة لا تفرز إلا نتائج مختلة.. فالثعبان لا يمكن أن يفرز عسلاً

وإن شاء الله اللقاءات الجاية كتير..ربنا يوفقنا

إبراهيم said...

Epitaph

الحمد لله إننا بنفكر نوصل للأفضل
ولما كشفنا الحمد لله عن الجرح هنعرف نعالجه بإذن الله وهيلتئم

المرة الجاية بإذن الله تكون معانا وياريت تخرج بقى من المدونة بتاعتك وتقابلنا

سلام

Sampateek said...

هايل جدا

احتفظ برأيي لنفسي بدل ما حد يزعل

:)
تحياتي

ياسمين said...

شكرا على كلامك يا ابراهيم وفعلا احنا حلمنا بيكبر رغم السلبيات المتوقعة وزى ما قلت احنا بشر فينا السلبيات والإيجابيات بتاعة كل البشر

أما بخصوص اسامة
فأنا اللى زعلانة مش هو .. واسامة انسان جميل بس عنده اندفاع غريب فى التعبير عن رايه .. كمان هو لازم يتعلم ازاى يوجه نقد للناس تقدر فعلا تسمعه وتقتنع بيه
وأنا فعلا خلاص مش زعلانة منه وهو فهم وجهة نظرى وناقشنا البوست بتاعك وطريقة نقدك الموضوعية اللى لازم يتعلم منها النقاد

تحية كبير لك يا ابراهيم

إبراهيم said...

كلبوزة السمباتيك

متشكر أولاً لزيارتك الجميلة ثانياً لإطراءك الجميل ثالثاً لريحة الأكل الحلوة اللي هفت من البلوج بتاعك

انا زعلت بقى لما مقلتيش رأيك.. ما أنا قلت {ايي أهوه.. اللي يزعل من الصراحة يبقى مش كويس

عاوز رأيك ضروري
نورتيني

إبراهيم said...

ياسمين

الحمد لله إنه بيكبر وانا فرحان بده.. وربنا معانا نتغلب على السلبيات

انا عارف إنك انتي اللي زعلانة منه.. مش انتي بس ده ناس كتير قوي.. اللي قريوا البوست بتاعه.. وانا الحمد لله مقريتهوش.. وكويس إنه مسحه وده يدل على إنه عرف غلطه.. وكمان كان مهتم جداً إنه يصالح الناس وواضح والله إنه زعلان جداً إن الناس زعلانة منه.. علشان كده محبتش إنه يزعل أكتر وقلت نصالحه.. كلنا إصحاب.. وكويس إنك اتكلمتي معاه.. انا فعلاً شايف إنه إنسان جميل..

وخلاص بقى هو اتعلم.. ومن ناحية النقد في البلد دي معتش نقد بقى يا مجاملة يا سباب.. بس خلاص بقى نسيب النقد للنقاد.. أنا بس كنت بقول مجرد رأي..

تحية ليكي انتي على حبك للموضوع وإهتمامك الكبير بيه.. واشوفك قريب
سلام

ذو النون المصري said...

انا فعلا سعدت جدا بلقائكم الجديد و بالفكره ز باتمني ان الظروف تكون مواتيه الشهر المقبل حتي اكون معكم
تحياتي

إبراهيم said...

ذو النون المصري

انا سعيد بكلامك ونورتني واتمنى اكتر منك إن الظروف تكون مساعداك إنك تكون معانا الشهر الجاي بإذن الله

شرفتني زيارتك

ادم المصري said...

ابراهيم

انت شخص جمييييييييل
قوي
شرفت طبعا بلقائك
تحياتي ليك

بعدك على بالى said...

ابراهيم

للاسف انا متشرفتش بالحضور بس لما قريت اللى انت كاتبه كانى حرت بالضبط

تحياتى مرة تانيه

farida said...

faridaمن اجمل البوستات اللي اتكتبت عن لقاء

افضل وصف فعلا
قد تثير غضب البعض
لكن لا يهم
الصراحه مفيش احلى منها


فعلا اجمل وصف من الممكن قرائته للقاء

تحياتي و احترامي
و اشكر جدو ان عرفني عليك و على مدونتك

جبهة التهييس الشعبية said...

القصاص لأسرانا الشهداء رجاء التوقيع وارسال الرسائل

إبراهيم said...

آدم المصري

إزيك يا عم احمد وإزي الواد الشقي؟

انت اللي جميل يا احمد بس كنت احب اشوفك في حفلة محمد حامد مجتش ليه؟

كان يوم جميل مفيهوش سلبيات زي المرة اللي فاتت.. كنت تيجي يا جدع

شرفتني

إبراهيم said...

بعدك على بالي

وبعده على بالي أنا كمان

والله تشرفيني جداً لو تبقي معانا اللقاء القادم.. في ابريل..ياريت تيجي ومتكتفيش بالمراقبة عبر شاشات الكمبيوتر..الجو بيبقى تحفة وهيعجبك اللقاء

شرفتني زياراتك الجميلة

إبراهيم said...

فريدا

كلامك جميل ورقيق وبيحرجني ونفسي كده اعمل اي حاجة تناسب جمال الكلام ده بس للأسف انا مملكش مناجم الماس

خدي بالك البعض اللي زعل من الكلام أو اتضايق يبقى عرف نفسه كويس.. وكلامي نقده ومس عيب فيه.. وبالتالي العيب مش في الكلام بقى.. في اللي اتضايق منه.. وفعلاً مفيش أحسن من الصراحة.. هي اللي بتبني

تحياتي الكبيرة ومتشكر قوي لزيارتك الجميلة واتمنى زيارات كتير واتمنى اكثر لو تحضري اللقاء الجاي وهيعجبك الجو بإذن الله

شكراً ليكي ولجدو اللي بيحرجني بجماله وبجد الراجل ده عمل معايا حاجات كده مش عارف اقول عنها ايه

دوللي said...

اللقاء كان فعلا خطوه جميله وافتكر انها رغبه من الحاضرين في التجمع كشعب واحد بس طبعا و كاالعاده دايما عندنا سلبيات بس نفسي بجد نتغير و نفوق بقي و نعرف امتي نهزر و امتي نكون جد
تحياتي

إبراهيم said...

دوللي

الاسم ده سمعته في اللقاء احب كنت اتعرف على الناس كلها بس للأسف زي ما انتي شفتي الناس كتير وما يساعدتش العدد ده كله على التعرف بشكل كبير

بس انا والناس اتقابلنا في حفلة محمد حامد في ساقية الصاوي واتعرفنا اكتر وكان يوم جميل

احب اتشرف بيكي قريب ويوم ما كنا في الساقية مع بعض مكنش فيه حاجة وحشة لأننا اتعرفنا أكتر

سلام وشرفني حضورك

نضـــال said...

ازيك يا ابراهيم؟؟
كان نفسى احضر التجمع ده
فى ناس كتير جميلة نفسى اشوفهم فعلا
بس كنت متوقعة طبعا السلبيات دى
لانى لاحظت ان ناس كتير اوي هتروح
فطبيعى لازم يكون فى سلبيات كتير
المهم انى كان نفسى اروحه
لانى زهقت من التجمعات التافهة واللى مالهاش لازمة وكنت بفكر فعلا ان موضوع زى التجمع ده المفروض نستغلةزى النشاطات الخيرية اللى انجى اتكلمت فيها او اى شىء مفيد
مجرد النقاش الهادىء وتبادل الاراء ده شىء رائع
لكن مش يبقى مكان للترويش والرغي الفارغ

إبراهيم said...

نضال

يا ريتك كنتي جيتي يا بنتي كنتي هتتبسطي قوي.. أوعي تفتكري السلبيات دي يعني اليوم كان وحش.. بالعكس والله اليوم لو كان وحش كنتي هتلاقي صمت عندي ولا هتعب نفسي ولا هرغي علشان مكانش هيفرق معايا.. انا كتبت السلبيات علشان حابب الموضوع ونفسي نتخطى دوائر المراهقة ونبقى كبار ويبقى لينا قيمة

شباب مصر جبارين أينعم نايمين وكسلانين بس بجد في الجد بنبقى جد

المرة الجاية بقى تبقي معانا.. عاوز املي عيني بالناس الكويسين اللي بحبهم في الله
:)
يالله بقى وخليكي ماشية ورا إنجي لما هتوديكي ورا الشمس

سلام