Monday, February 26, 2007

لا توجد بنات قبيحات

حديث إذاعي طويل

..منتظر اتصالاتكم على تليفون البرنامج-
قلتها بشكل روتيني.. كان الجميع في الاستديو يقاوم النعاس عداي.. فأنا اعتدت على هذا الوقت من العمل.. فأنا وطواط آدمي يعشق الليل.. خاصة أني لم أتزوج بعد.. رغم أني قد عالجت العديد من المشكلات الخاصة بالحب والزواج.. أثناء عملي بالجريدة أو من خلال هذا برنامج.. ربما تتغير أفكاري بعد الزواج.. بل ربما أمتنع عن هذا العمل كلية
مر وقت ولم يتصل أحد بعد.. ربما هي خطوط الهاتف.. فالبرنامج لاقى نجاحاً شديداً.. وإقبال رائع خاصة من الفتيات الباحثات دائماً عن الحب
..أفقت على رنين الهاتف فاعتدلت.. أخذت إشارة من المخرج أنها فتاة
ألو
ابتسمت وأنا أقولها رغم تيقني من أن أحد لا يراني
..ألو-
..صوت خافت لفتاة.. تصورتها تتلفت حولها يميناً ويساراً وهي تتحدث
أهلاً وسهلاً بحضرتك.. ممكن تعرفينا بنفسك؟-
..أحب أحتفظ بنفسي لنفسي.. ما اعتقدش إني أهم حد إنه يعرفني-
..لا أعلم لماذا توقعت تلك الإجابة.. ربما لأن الصوت مألوفاً
صوتك مش غريب عليه؟-
أيوه.. أنا كلمتك قبل كده.. فاكرني؟-
:بالطبع لم أتذكر أي شئ ولكني بدبلوماسية أجبتها
أيوه طبعاً.. إزيك عاملة إيه؟-
..الحمد لله.. بعت لك رسالة على الجريدة.. ومع ذلك مردتش عليها-
تذكرت الآن.. رسالة من فتاة عجيبة تخبرني أنها تحدثت معي عبر البرنامج.. رسالة تحمل قصة حزينة.. قصة حب ..تذكرت منها هذا المقدار فقط.. ولكن التفصيلات أبت أن تستيقظ في نفسي.. يبدو أن صمتي قد طال
بتتكلمي منين؟-
..يا له من سؤال سخيف.. لم أجد ما أقوله
..من البيت-
اتجوزتي؟-
سؤال أشد سخافة.. تذكرت الآن أن مشكلتها تتعلق بأنها لم تتزوج بعد
.. اتقدم لي واحد.. دكتور جامعة.. أكبر مني بعشرين سنة-
..قالتها بسخرية مرّة
وبعدين؟-
..راجل عاقل.. لكن رفضته-
رفضتيه ليه طالما عاقل؟-
لو هتجوز واحد علشان هو عاقل.. يبقى الأحسن لي إني أتجوز آله حاسبة أو كمبيوتر-
:أطلقت ضحكة.. أما هي فقد استمرت بعد زفرة حارة
على العموم أنا مش متصلة علشان كده، أنا حاولت اتصل الحلقة اللي فاتت بس معرفتش.. الخط مشغول بشكل ينرفز-
..انتي عارفة.. الضغط فظيع-
.. عارفة بس كنت أحب اشترك في الحلقة السخيفة دي-
صدمني أسلوبها الحاد.. وكاد المخرج أن يقطع الخط.. لولا إشارة مني تمنعه من فعل ذلك
طالما شايفة البرنامج سخيف.. بتتصلي ليه؟-
.. أنا آسفة.. أنا قلت الحلقة اللي فاتت مقلتش البرنامج كله.. البرنامج كويس.. ولولا كده مكنتش تابعته-
إيه اللي معجبكيش في الحلقة اللي فاتت؟-
..موضوعها-
..قالتها وكأنها تبصق
قصدك البحث الخاص حول الحب؟-
آه وخاصة الجزء اللي بتقول فيه أنه مفيش بنت وحشة.. قلت إن كل البنات جميلات-
معترضة ليه على ده؟-


-معترضة لأني ببساطة بنت مش جميلة
اندهشت لهذا الأسلوب.. لم أتوقع أن تنعت فتاة نفسها بالقبح

..إحنا كنا بنتكلم الحلقة اللي فاتت على الحب الروحي-

.. كلام فارغ ــ قاطعتني بحدة ــ مفيش حاجة اسمها الحب الروحي-
:قلت بنفاذ صبر
.....إزاي ! لو كنتي سمعتي تليفونات المتصلين هتعرفي إن-

..مراهقين-
..قاطعتني ثانية

إيه اللي يخليكي تقولي كده؟-
..تجربتي الشخصية-
أنا قلت إن كل بنت حلوة في عين اللي بيحبوها والدليل على كده إن فيه بنات جميلات جداً لكن مش محبوبين وفيه.. بنات أقل منهن جمالاً ومع ذلك محبوبات جداً
ليه قلت أقل منهم جمالاً، ليه مقلتش ببساطة بنات مش جميلات-
لأنه مفيش بنات مش جميلات-
..أنا بنت.. ومع ذلك مش جميلة-
..مش انتي اللي تشوفي ده.. غيرك اللي يشوفه-
.. غيري شايف كده-
..قالتها بمرارة
..لازم تكوني واثقة في نفسك ومتسمعيش لأي حد-
..أشار إلي المخرج محذراً.. وقت البرنامج لا يسمح لكل هذه المهاترات
أنا حاولت أحكي مشكلتي الحلقة اللي فاتت بس منفعش.. تجربة خاصة تهد كل اللي اتقال طوال ساعتين الحلقة اللي فاتت-
ممكن تدخلي في الموضوع مباشرة.. قولي مشكلتك وسيبينا إحنا نحكم-
..أوك.. أنا طالبة.. تقريباً عندي ستة وعشرين سنة-
:سألتها متعجباً
.. طالبة وعندك ستة وعشرين سنة-
..سبني أكمل-
..آسف-
أنا في رابعة تجارة.. مكنتش عاوزة أخلص دراسة.. بصراحة حياة الجامعة داخلة دماغي.. كنت خارجة من ثانوي وأنا بفكر في الجامعة نفسي أقابل حد أحبه ويحبني بجد.. رميت لبس المدرسة ولبست اللبس اللي يناسب بنت عندها عشرين سنة.. لكن للأسف اللبس مش كل حاجة.. شفت بنات كتير بتحب وتتحب.. وأنا لأ.. كل البنات بتتعاكس في الكلية.. وأنا لأ.. وعرفت طبعاً إن السبب إني مش حلوة.. ومفيش شاب بيعاكس بنت مش حلوة
.. وبعدين-
قلتها بضيق.. لا أحب هذا النوع من المشكلات العاطفية.. البحث عن الحب
:قالت
..الموضوع ده عملي أزمة نفسية كبيرة..وخلاني انطوي وابعد عن أصحابي-
ليه كده؟-
علشان مسمعش كلمة تجرحني.. زمايلي بيعاملوني كولد.. وده بينرفزني.. بتعمد إني ألبس لبس صارخ علشان ألفت نظرهم-
:ضحكت وأنا أقول
.. فكرة كويسة-
بس مجابتش نتيجة.. دايماً يقولوا إني أختهم.. حاجة تضايق فعلاً.. محاولة منهم إنهم يجاملوني.. بس محاولة سخيفة-
أكيد ميعرفوش إن الكلمة دي بتضايقك-
..يمكن.. المهم إن كل الحاجات دي كانت سبب إني أتحاشى أصحابي وخصوصاً البنات-
غيرانة منهم؟-
:ترددت قليلاً ثم قالت
.. أيوه.. وكمان علشان محسش بالنقص اللي عندي.. وغير كده بتضايق لما أتحط في مقارنة مع أي حد-


.. أكيد محدش يحب يقارن بحد تاني.. بس كملي-
من حوالي شهر كانت واحد صحبتي عاملة حفلة تنكرية في بيتها.. بصراحة فكرة تجنن.. وأهي نوع من التجديد وكان البيت زحمة موت شباب وبنات ورقص وضحك.. والمختلف إن الكل لابس أقنعة مختلفة الأشكال والألوان فما كنش حد يقدر يميز التاني.. وده كان هدف الحفلة.. إننا نعمل صداقات وعلاقات جديدة.. وكله يرقص مع كله من غير أي مشكلة
.. فكرة كويسة-
أكيد.. كان الجو جامد جداً.. بس أنا كنت واخده جمب من الحفلة.. عارفة إن محدش هيعبرني كالعادة.. اكتفيت إني..أقعد بعيد أتفرج.. كان الجو تحفة.. وفعلاً أكتر وقت اتمنيت فيه إني أكون جميلة
..قالتها بحسرة.. شعرت أني أراها عبر أسلاك الهاتف.. لا أعلم لماذا تخيلتها جميلة
:استرسلت في الكلام قائلة
فوجئت بشاب جاي ناحيتي.. كان مقنع برده.. اندهشت لما لقيته بيكلمني بود وطلب مني ارقص معاه تخيلته بيبتسم من تحت القناع.. اسلوبه كان رقيق جداً.. استغربت.. مديت ايدي ناحية وشي.. وعرفت سبب دعوته للرقص.. كنت نسيت إني لابسة القناع.. كان حظي حلو
..يعني هو طلبك للرقص كرجل عاوز يرقص مع بنت.. من غير أي اعتبارات تانية-
.. حاجة زي كده.. رجل وامرأة فسيولوجياً.. وإن كانت المرأة دي قبيحة-
وافقتي ترقصي معاه؟-
بتهرج ! طبعاً.. ده أنا كنت طايرة من السعادة..دي أول مرة..حسيت فعلاً إني بنت بجد..رغم إني برقص كتير قدام المرايا علشان أحس بأنوثتي.. بس كنت دايماً بتمنى أرقص مع راجل.. ودي كانت الفرصة..متصور إني أقدر أرفض؟
..أكيد لأ-
قمت معاه زي المسحورة.. محستش إلا بأيده وهي بتلف حوالين وسطي.. إحساس رائع-
اتكلمتوا في حاجة؟-
في الأول لأ.. كنت في عالم تاني.. والرقصة خلصت للأسف.. من ارتباكي سحبت نفسي للركن اللي كنت قاعدة فيه..وأنا مبهورة-
ده إحساس طبيعي تجاه شئ كنتي محتاجاه ودخل حياتك فجأة..تمام زي إحساس اللي يقعد أسبوع من غير ما يشرب والدنيا حر..والناس كلها بتشرب.. وفجأة تنزل عليه ميه ساقعة
محاولتش أترجم إحساسي..كنت مركزة إني استمتع بيه لآخر رمق..وبعدين سمعت موسيقى أسباني بحبها جداً هزيت جسمي مع الموسيقى بسعادة.. ولقيت نفس الشخص بيطلب مني إني أرقص معاه تاني
..جميل جداً-
وبعد شوية قعدنا نتكلم.. مقلتلوش عن اسمي.. طول الحفلة مبعدش عني.. اختفى خمس دقايق بس عدوا زي الخمس ساعات..خفت ليكون مشي.. لكن لقيته جاي بسرعة ناحيتي وفي أيده ورد.. عمر ما حد أداني ورد لحد اللحظة دي.. اعتراف يضحك.. مش كده؟
:قالتها وتهدج صوتها حزناً.. ثم استرسلت قائلة
..
على العموم الشبان مبيدوش ورد إلا للبنات الجميلات.. بس أحسن حاجة في الدنيا إن حد يهتم بيك.. انت عارف لقيته بيجري ناحية البوفيه وجابلي عصير برتقال.. وشربنا وضحكنا.. كانت دماغي بيدور مش مصدقة.. كأنه حلم ..اتمنيت إني مصحاش منه.. فعلاً فكرة الحفلة التنكرية دي رائعة.. ياريت كان ربنا خلق الناس كلها مقنعين
:ضحكت قائلاً
..هو فعلاً ربنا خلقنا مقنعين.. بس أقنعة مزيفة بنداري بيها حقايق مش تمام
والقناع اللي كنت لابساه في الحفلة كان بيداري حاجات مش تمام.. وبسبب إن البنات كلهم كانوا لابسين أقنعة.. بقيت للمرة الأولى زيي زيهم.. لو كان شافني من غير القناع.. كان مستحيل يرقص معايا.. ولا حتى عبرني
-مش ضروري
قلتها بتحد
على العموم اتكلمنا في حاجات كتير.. والوقت إتأخر.. وللأسف كنا مضطرين نمشي.. طلب مني بإسترجاء إننا نتقابل تاني.. طبعاً أنا ما-
صدقت.. بس هنتقابل طبعاً من غير أقنعة.. قاللي كده وهو بيتحسس قناعه.. وأنا زعلت.. هو لازم نقلع الأقنعة؟
..أكيد.. مش هتعيشي عمرك كله بقناع-
أهو أحسن من الحقيقة.. بس كنت لازم أقابله تاني.. حسيت إن الدنيا أخيراً بتبتسم لي..اتفقنا نتقابل تاني يوم في كافيه.. مشهور.. قلتله إني هكون لابسة فستان أزرق.. ووصلني للبيت والأقنعة لسه على وشوشنا
!..غريب-
.. ده كان شرط الاحتفال.. إن محدش يقلع قناعه قدام حد-
..شرط غريب-
بس مفيد.. طبعاً الليلة دي منمتش.. كنت بفكر فيه.. وبتخيل شكله.. ولما نمت بصعوبه.. حلمت بيه أسمر طويل..قوي.. وشوية أشوفه أبيض عينه عسلي.. بس حبيته في كل الوشوش
عجيبة.. حبيتي واحد متعرفيش شكله؟-
:قالت بسخرية
وإيه علاقة الشكل بالحب.. مش ده اسمه حب روحي
لم أجد ما أقوله.. وضحك كل من في الأستوديو من حولي.. قالت
رحت تاني يوم قبل المعاد بعشر دقايق.. وقعدت على أول ترابيزة ناحية الشمال ــ زي ما اتفقنا ــ كانت عيني بتبص.. لكل واحد بيدخل المكان.. بس أنا كنت عارفة إني هعرفة بمجرد ما أشوفه
.. عارف.. بيسموا الموضوع ده عين البصيرة-
يسموه زي ما يسموه.. المهم جه في المعاد بالظبط.. عرفته على طول..بص ناحية أول ترابيزة.. وبصلي.. أسمر.. وعينه جميلة وقوية.. دار بعينه في المكان.. وراح ناحية أول ترابيزة ناحية اليمين
مش اتفاقكوا كان ناحية الشمال؟-
فعلاً.. يظهر أنه نسي.. أو متصورش إن الدميمة دي هي اللي كان بيرقص معاها-

قالت الجملة الأخيرة بمرارة.. وصمتت.. شعرت أنها تبكي.. ولكن تكتم دموعها.. تمنيت لو أحتوي تلك الفتاة جميلة الروح
:قالت أخيراً
قعد قدامي.. وكان بيبص ناحيتي من حين لآخر.. بس من غير اهتمام.. كان كل اهتمامه بالباب والساعة.. وبعد ساعة.. كاملة.. قام ومشي
..صدمت حقاً
مشي؟-
:قالت متألمة
فهمت للأسف.. كان بيدور على وش تاني غير وشي.. قلبي وجعني بجد.. كنت عاوزة أجري وراه وأحضنه.. بس كبريائي منعني.. مش عارفة حتى إن كنت أقدر أعمل كده ولا لأ.. مكنتش عاوزة أكسّر الصورة الجميلة اللي رسمها لي جواه.. يكفي إنه يحبني لتصور جواه.. أكيد أفضل من الحقيقة

..الحقيقة أفضل من الخيال دايماً-

اللي إيده في الميه مش زي اللي إيده في النار.. عرفت ليه أنا مبصدقش حاجة اسمها الحب الروحي.. والجمال الروحي.. ده كلام روايات مين اللي يهتم بالبنت القبيحة.. الدميمة.. علشان كده عاوزة أسألك.. مين اللي محتاج كلامك عن الحب..؟ علشان يوصل للحب.. لو كنت جميلة مكنتش هحتاج لنصائح علشان أوصل للحب.. كان هيجيلي لوحده

:كنت من داخلي أشعر أنها على حق.. قلت مواسياً
.. كل إنسان فيه حاجات حلوة كتير.. بس مبيشفهاش-
:قالت
تعملّي إيه الحاجات الحلوة لو أنا مش جميلة.. أنا حزينة.. لأني مليش مكان في عالم كنت بتمناه.. عالم الحب.. العالم ده للجميلات بس.. أنا حبيت للأسف.. بأي حق.. ألعن نفسي.. أنا وحشة.. ببص لكل الجميلات بحسرة.. حتى أختي اللي بتسهر للصبح على التليفون.. شباب بالآلاف بيكلموها.. قول لي أعمل إيه؟ ليه ربنا بيخلق بنات جميلات وبنات قبيحات..؟
..كانت شبه باكية
:قلت باستسلام
زي ما بيخلق الربيع بزهوره.. والخريف بشجره الميت.. زي ما بيخلق واحد طويل وواحد قصير.. زي ما بيخلق الجميل والقبيح.. بس المهم هو نظرتنا إحنا للجميل والقبيح.. في ناس بتكره الشتا.. وناس بتكره الصيف.. ناس بتحب البحر.. وناس بتكرهه.. ناس بتشوف غروب الشمس جمال وسحر.. وناس بتشوفه موت وفناء.. المهم إنتي شايفة الجمال إزاي؟
مش عارفة من ساعة ما كبرت وحسيت إني المفروض بنت بس ده مش صحيح.. معنتش بشوف حاجة.. آسفة أنا طولت عليك.. وكمان -مش هقدر أكمل.. تعبت.. آسفة مضطره أقفل.. وهكلمك مرة تانية
يا ريت.. نورتيني يا...... معرفتش اسمك؟-
..رغم إنه مش هيفرق معاك بس هقولك.. جميلة.. اسمي جميلة-
ثم أغلقت الخط.. توالت الاتصالات بعد ذلك تتحدث عن تلك الفتاة.. البعض يوصفونها بالماسوشية.. والبعض يبكون- ..لأجلها.. وأنهيت الحلقة دون حل
لا أعرف.. ظل كلامها يدور في رأسي كثيراً.. هل ستتصل بي ثانية أم لا.. يبدو أنها لن تتصل.. في هذه الأيام أخذتأنظر للبنات اللائي لسن على قدر من الجمال.. تذكرت قول إحداهن " لما بروح السينما باقطع تذكرة الصف الأول مبشوفش حد.. وبالتالي محدش بيشوفني " هذه كلمة سمعتها وأنا طالب في الجامعة..إنها لم تكن جميلة أيضاً وبشكل غريب أخذت ألاحظ اللواتي يتجولن وحدهن.. والجالسات في المسرح والسينما دون رفيق.. إنهن جميعاً لسن على قدر من الجمال فأخذت تلاحقني فكرة " أن كل واحدة منهن كانت في حفلة تنكرية.. وأنهن يكبتن حباً ما"
أما أنا فلم أعرف ماذا أفعل لصاحبة الاتصال.. وبماذا يمكن أجيبها؟.. إليك أيتها الفتاة الحزينة أكتب فقط.. فليحزن الناس قليلاً من أجل قصة حبك.. ويتسامرون حولها.. لعل حبيبك صاحب القناع يقرأ القصة
تذكرت سؤال سألتني إياه إحداهن بعد الحلقة بعدة أيام.. وأنا أحاول أن أؤكد على نظرية الحب الروحي.. " أنت مثلاً ..مش متجوز.. ممكن فيوم تتجوز واحدة مش جميلة " وفي ذلك الحين لم أجد ما أقوله
ذهبت للأستوديو في الليلة التالية.. وتوجهت ناحية ملفات الحلقات الخاصة بالبرنامج.. كان ملف حلقة " لا توجد بنات قبيحات " لا يزال على السطح.. قرأته مراراً.. ثم لم أجد أمامي إلا أن أودعه سلة المهملات

48 comments:

نضـــال said...

احم ..احم
ازيك يا عم اسامة منير؟
:D
اولا رغم انى اتخضيت من شكل الموضوع عشان طويل قبل اما أقرأ الا انى محستش بطوله وانا بقرأه خالص لانه سلس وخفيف وحلو اوى
ثانيا
ايييييييييه ..اقول ايه ولا ايه؟
جميل منك اوي انك تحس بالمشكلة دى رغم انك راجل
يعنى انا كبنت حسيت بالبنات اللى ممكن يكونو مش حلوين
حطيت نفسى مكانهم
(وده طبعا معناه انى ملكة جمال :D)
جايز تكون جملة لاتوجد بنات قبيحات فيها جزء بسيط من الصحة
وهو ان الجميلة والاقل جمالا
كل دول بيتحبو ..وهم دول اللى ممكن ينطبق عليهم موضوع الحب الروحى
او الجمال الروحي
واحدة مش رائعة الجمال لكن روحها حلوة اوى ...مكن اى واحد يحبها
"مع ان معظم الرجالة مش بيبصوا غير للشكل "
الراجل من دول تلاقيه يعتبر حبيبته ملااااك وانها احلى واطيب واجمل واحدة فى الوجود
عشان جميلة
يهتم بيها
يخاف عليها
يجيبلها ورد
يجيبلها عصير :D
لكن واحدة زي "جميلة" اللى اسمها وجعنى اوى
دى تعمل ايه؟
دى تتجوز واحد اكبر منها بعشرين سنة
شىء مؤسف
-----
تعملّي إيه الحاجات الحلوة لو أنا مش جميلة.. أنا حزينة.. لأني مليش مكان في عالم كنت بتمناه.. عالم الحب.. العالم ده للجميلات بس
-----
صحيح لما الانسان الحاجات الحلوة اللى فيه مش بيقدرها الناس
ولما يفقد الشىء اللى بيتمناه ؟؟؟؟؟
مش عارفة؟ يعمل ايه؟
----
"أما أنا فلم أعرف ماذا أفعل لصاحبة الاتصال.. وبماذا يمكن أجيبها؟"

إبراهيم محسن said...

نضال
أولاً أنا مش أسامة منير أنا إبراهيم محسن
شفتي الغرور
الموضوع طويل فعلاً ودي حاجة عملتلي مشاكل كتير.. أولاً مين هيستحمل يقرا موضوع بالطول الفظيع ده.. وحتى لو حد استحمل مين هيقدر يعلق بعديه.. وبعدين الناس بتحب الحاجات الصغيرة.. فتوقعت إن محدش هيقرا حاجة.. بس طبعاً صممت إني أكتبه.. والمشكلة التانية في إني أحطه في البلوج.. الكتابة في البلوج فظيعة جداً مفيش أي نوع من التقدم.. كتبت الموضوع وعدلته ييجي خمسين مرة..تعبت
ــــــــــــــــــ
جميل منك اوي انك تحس بالمشكلة دى رغم انك راجل

هما الرجالة حجارة مبيحسوش يعني...؟ دي مشكلة فعلاً بواجهها كتير.. وحاسسها جداً

ـــــــــــــــــــــــ
وده طبعا معناه انى ملكة جمال

ثقة ولا غرور؟ ولا الاتنين؟ على العموم كويس إن الواحدة تشوف نفسها ملكة جمال سواء كانت فعلاً كده ولا لأ
:)
ــــــــــــــــــــــــ
قابلت بنات كتير مش حلوين ومع ذلك مرتبطين.. وواحد صاحبي كانت مرتبط بواحدة أنا أحلى منها وكان بيقول إن دي أحلى بنت شافها في حياته..مش مجاز.. كان متأكد من ده

أما موضوع الحب الروحي والجمال الروحي ده موضوع معرفش أحسمه لأنه أكبر مني وعلشان كده معملتش للموضوع نهاية حاسمة
أنا كإبراهيم مش مع البنت صاحبة الإتصال ومش مع المذيع.. كل واحد له رأيه وانا مع الاتنين
ــــــــــــــــــــــت
مع ان معظم الرجالة مش بيبصوا غير للشكل

ده حكم عام.. الرجالة بيبصوا للشكل ساعة التهريج أو شغل المراهقين.. بس ساعة الحب بجد بينسوا الدنيا كلها.. ومتحكميش حكم عام حتى لو قلتي معظم مش كل.. مش معظم الرجالة ومش نصهم
ــــــــــــ
عشان جميلة
مش علشان جميلة يهتم بيها.. علشان بيحبها.. وفي الحفلة الولد صاحب القناع مشفش البنت دي جميلة ولا لأ.. ورقص معاها..كانت مجرد بنت.. يعني البنت جميلة جمال مجرد..حتى لو كانت مش جميلة

كلامها عن عالم الحب ده رأيها هي بس مش رأيي ومش رأيك.. وشكلك موافقاها رغم إنك جميلة زي ما قلتي..مش هيوافقها إلا غير الجميلات.. خدي بالك

معرفتيش تقوليلها إيه؟ ولا أنا؟ ولا المذيع ولا حد هيعرف.. الهي بس اللي ممكن تحل مشكلتها


بجد بشكرك لأنك أهتميتي تقري الموضوع رغم طوله.. وشكراً للتعليق الطويل ده.. ده فرحني ويدل إن قلمي لسه حبره مخلصش.. اتمنى زيارة تانية..ولو تعرفي بنت إديها عنوان البوست.. يهمني رأي البنات

سلام

Yasmine Adel Fouad said...

قريت البوست يا ابراهيم اللى مش أسامة

معنديش تعليق لان كلامى مش هيودى و لا هيجيب

الجمال مينفعش حد يقولنا عليه لازم نحسه بنفسنا
يعنى انا لو حاسه انى جميله هتصرف على هذا الاساس لكن لو حاسه انى وحشة و طوب الارض بيقولى العكس مش هصدقهم
و ده ينطبق على كل اوجه الجمال سيادتك

shahrzad_storry teller said...

اه اسامه منير تاني
ده كان لسه عندنا في الكلية الاسبوع اللي فات
عموما خلاص ملتزعلش
بص انا مش عارفة اقولك ايهفي حكاية البنات اللي مش جميلات بس اكيد برده فيه ولاد مش حلوين
اكيد الموضوع حيفرق قوي مع البنت اكتر من الولد
بس انا لسه بأؤمن بالجمال الروحي وان الجمال عملية نسبية فعلا زي ما فيه ناس بتحب الحر زي وناس بتكره زي أصحاب كتير لي
البنوتة دي يمكن تبقى احسن بعدعلاج نفسي
يمكن حاجات تانية زي عمليات تجميل او حتى مش لازم
ممكن تروح جيم
............ لكن مش ده الحل لازم كل بنت تقتنع من داخلها انها فيها حاجة حلوة وان روحها حلوه
ولازم تقتنع ان ان ربنا بيقسم الأرزاق زي ما الربيع ملين زهور جميلة بس كمان فيه رياح الخماسين المزعجة وبنعاني فيه من الحساسية
فاهمني
انا بس عايزه اقول شوف الجمال بروحك مش بعنيك
............ودلوقتي فيه سؤال آخير تتجوز واحدة مش حلوة قوي ولاواحدةكدابة............
بالنسبة لأسلوبك اكتر من رائع واحساسك بجد عالي قوي...........
الله ينور

محض روح said...

بوست جميل اوى
وبيقول حقيقه مهما حولنا ندريها بس موجوده
حتى لو قلنا جمال روح وعشق الجسد فانى بس برضه
بس فيه ناس حلوين بيحسو انهم وحشين والعكس الجمال مش رائ ممكن واحد يقوله لوحده
علشان تكون جميل لزم تكون انته حاسس من جواك كده
ومتنظرش حد يقيمك
على العموم كلامك معبر وانا سعيده انى
وتعرفت على مدونتك
باى يا جميل

Amany Y. El-Saeed said...

إبراهيم

إنت مش متخيل صدمتى...الكومنت الطويل العريض ده...أنا تاني مرة أكتبه
يلا...ربنا يعوض عليا

كنت بقولك إن الحوار ده حلو أوى...مش عارفه ليه حسيت إحساسها وهي بتتكلم...و إحساسك وإنت بتسمعها...يمكن ده يرجع لأسلوبك المنمق في الكتابه

في موضوع الجمال عموما...أقولك رأيي بإختصار
مفيش حاجه اسمها "مفيش بنت جميله وبنت وحشه"...طبعا في...في بنت جميله وبنت وحشه...و في ولد جميل و ولد وحش...لكن هل يقتصر الجمال على ملامح الجسد فقط؟؟؟ تبقى نظره ضيقه أوىىى...كل حاجه فينا ليها درجه من الجمال أو القبح...الشكل...التصرفات...الطباع..أسلوب الحياه
يمكن الشكل بيسبق في أخذ نصيبه...مش لأنه الأهم...لأ أبدا...لأنه الأسبق ظهورا...لكن بعد ما ياخد درجته من الجمال...هتبدأ تظهر باقي الصفات مطالبه بحقها...لحد ما تاخد كل حاجه فى البنى آدم حقها...و في النهايه إما هيكون جميل أو لأ

بالنسبه لجميله...أنا مش عارفه إنتى حقيقيه ولا لأ...ولاهتقري كلامي ولا لأ...بس إنتى حرام تظلمى نفسك عشان فيها حاجه مش جميله ويمكن فيها مليون حاجه تانيه جميله...زي ما واحده تتغر بإن فيها حاجه جميله...ويمكن فيها مليون حاجه تانيه مش جميله

في حته الجمال هحكيلك حاجه معكوسه...كان في ولد...وسيم جدا...مفيش اتنين يختلفوا على وسامته...و لما فضلنا مع بعض كلنا لمده أربع سنين...بعد سنه واحده مفضلش اتنين لسه بيشوفوه وسيم

الزعيـمة said...

...
بوست تحفة يا ابراهيم
بجد جديد من حيث الفكرة والمضمون
واسلوب عرضك شيق جدا وسلس

انا بتفق جدا مع كل الاراء البتقول ان الانسان كما يري نفسة يراه الاخرين


الثقة بالنفس مطلوبة وحتي لو الجمال قليل او حتي معدوم يجب ان يصحبة امكانيات اخري زي الروح الحلوة والدم الخفيف لكن يكون الواحد وحش وكمان نكدي اظن يباه صعب بجد

عموما انا مصممة ان مفيش اى بنت وحشة
ولا راجل كمان عشان بحب المساواة
كل انسان ربنا خلقة بجمال معين فى شئ محدد سواء فى الملامح او الروح او العقل

كمان مقاييس الجمال بتختلف من شخص لاخر
انا اشوف الجمال بمقاييس معينة ممكن مش يشوفها حد تانى


القصة بجد اثرت فيا
ولو فية بنت او ولد بيفكر كدا
يا ريت يعرفوا ان ربنا مش بيخلق
اى حاجة وحشة لكن المفروض ندور على قيم الجمال فينا ونعتني بيها



ارق تحياتي لك
ومرة تانية البوست بتاعك رائع

smraa alnil said...

لالالا بص بقي رغم ان دي اول مرة ازورك فيها
بس اتشديت اوي
انا مؤمنة ان الجمال جمال الروح فعلا
وان ربنا سبحانه وتعالي مش خلق حد وحش
وانه جمله بشوية حاجات بتطغي علي حاجات تانية
عارف

انا كنت مرة في محطة الاوبرا وانا ماشية لقيت واد زي القمر ما شاء الله عليه وبيتكلم مع بنت مدياني ضهرها
قعدت جنب البنت دي
وكان الواضح ان الولد الامور دة اوي الابيضاني ذات العيون الملونة والشعر البني الناعم بيتحايل علي البنت دي عشان تسامحه وان هو مش قادر يعيش من غير رضاها ويجي صوتها وهي بتتامر عليه
وانا عماله اقول بيني وبين نفسي يا بنت اللذينا بقي دة انا لو هموت وواحد زي دة يكلمني هفوق وانتي مش عايزة تسامحيه
وكنت متغاظة منها اوي
والمرتو جه
ولقيت الولد وابنت وانا وقفنا عشان نركب المرتو
الحقيقة هما ركبوا وانا فضلت متنحة ومذبهلة لدرجة اني تنحت ووقفت في المحطة لحد ما ركبوا
لو قلتلك ان البنت بجد من الصومال
وملامحها عادية جدا وسمرا اوووووووووي
ساعتها بس قلت فعلا هو شافها من جوة وحس اد ايه هي حنينة وجميلة من جوة
ربنا عمره ما خلق لا راجل وحش ولا بنت وحشة
كل واحد جواه سحر خاص
مش هنكر اني احيانا بفكر بنفس تفكير البنت دي
بس برجع واقول الحمد لله
لازم تكون راضية وكلما راضيين
هي بس بصيت للشباب الهايف اللي مش وراه غير ان البنت الي معاه الكل يشاورعليها من جمالها

مثال بسيط احدي قريبنا في الشغل ورت صورتي لواحد عايز يتجوز يمكن يحصل نصيب
الولد قالها لالالالالا دي امورة
قلتله اومال انت عايز ايه
قال انا عايز واحدة وحشة
قالتله ازاي يعني هو في حد وحش
قالها لا طبعا بس انا مش عايز واحدة ملامحها حلوة عشان انا بغير اوي ومش عايز حد يبصلعها غيري تكون حلوة في نظري انا بس

يعني في ناس بتفكر صح احيانا
ربنا يكرمها يارب ويرزقها بالحب اللي ياخدها من الدنيا

إبراهيم محسن said...

ياسمين
إزيك يا حرة..أخيراً نورتيني
يعني إيه كلامك مش هيودي ولا هيجيب..بتهرجي إنتي عارفة إن رأيك يهمني جداً

هو فعلاً الجمال ينبع من إحساس صاحبه أنا معاكي..يعني القضية ثقة بالنفس..والبنت دي مأساتها إنها فعلاً مش شايفة نفسها حلوة والآخرين شايفنها برضه كده..فالسؤال؟
ماذا يمكن أن تفعل؟

إبراهيم محسن said...

راوية حكايات شهرزاد
إزيك؟ نورتي البلوج بموسيقى ألف ليلة وليلة

إزاي تقولي إن الموضوع هيفرق مع البنات أكتر من الولاد..هو إحنا معندناش إحساس ولا إيه؟

هو فعلاً الجمال الروحي شئ ضروري جداً والأحاسيس الروحية موجودة..بس عند مين؟
هخلي جميلة تردي عليكي وتقولك إن الإحساس الروحي ده بتاعكوا انتوا..بتاع الجميلات بس..لكن هي مش لاقياه..ومش هتؤمن بحاجة محستهاش..هسيبك إنتي تردي عليها

ممكن تروح جيم

الكلمة دي ضحكتني جداً..هو ضروري البنت تكون سمينة علشان تبقى وحشة؟..في بنات تخان ومزز معلش يعني..على فكرة جميلة بتقولك أن جسمها حلو جداً..بس ملامح وشها هي المشكلة

ولازم تقتنع ان ان ربنا بيقسم الأرزاق

أكيد النقطة دي أهم حاجة..ده اللي بيعمل الإيمان فالإقتناع فالثقة بالنفس

ودلوقتي فيه سؤال آخير تتجوز واحدة مش حلوة قوي ولاواحدة كدابة؟

ليه بتقولي مش حلوة قوي..قولي وحشة..عادي يعني
السؤال ده صدمني..فعلاً الروح السيئة أفظع من الملامح السيئة

شكراً بجد لكلامك الجميل..اتمنى الزيارات متتقطعش

إبراهيم محسن said...

محض الروح

إيه النور ده بس؟ البلوج هيفرقع من النور
نفس الكلام اللي بيضايق جميلة أكتر وبيخلي نفسيتها تتدمر..الجمال إحساس
جميلة بتقولك حتى لو الجمال إحساس..وهي حاسة إنها جميلة واللي حواليها مش حاسين..هتتجوز إزاي؟..هتحب إزاي؟

أنا حاسس إن الربيع جميل ولازم أخرج فيه وأقعد على النيل مع أصحابي..بس كل أصحابي شايفين إن الربيع رياح خماسين بس..هعمل إيه؟..أنا مش عايش لوحدي للأسف..لازم الكل يحس معايا بإحساسي علشان أحقق اللي جوايا

ومتنظرش حد يقيمك

معلش..مينفعش محدش يقيمني..أنا بلا ناس..بلا قيمة

أنا اتشرفت بيكي بجد..أرجو إنك تكوني من أصدقائي..متكونش جميلة بس اللي مجمعانا وتنسوني بعديها..شكراً

همس الليل said...

بئا انا جايه وجايبه فى ايدى خماشر كيلو برتقان وخماشر زيهم سفندى
والاقى العنوان كدا يا مفترى

ومزهقنى ادخلى كاتب موضوع عن البنات وموضوع مهم وبتاع والاقيك شاتم البنات القمر اللى زيى هههههههههههه

بئا اول القصيده كفر كدا
لمفيش بنات قبيحه

بص انا بعلق بس على العنوان
ورجعالك تانى اقرا الموضوع وابص فى المرايه اشوف لو كنت قبيحه ولا لاءه

إبراهيم محسن said...

أماني

آسف على انك كتبتي التعليق مرتين..بس حاولي تاخدي إحطياطاتك بعدين

إحساسك بيها وبيا ده شرف بجد..أرجو إن الإحساس يكون ممتع

مفيش حاجه اسمها "مفيش بنت جميله وبنت وحشه"...

أخيراً رأي معارض

يمكن الشكل بيسبق في أخذ نصيبه...مش لأنه الأهم...لأ أبدا...لأنه الأسبق ظهورا

كلام عاقل وجميل جداً..في الجون يعني..هو ده مربط الفرس..إن الشكل هو الأسبق ظهوراً..وعيب أغلب المصريين إنهم بيبصوا للبترينة..البرفان..بينسوا البضاعة من جوا ..نسيوا إن وش القفص ده مش هو المتحدث الرسمي عن القفص..كذلك الكلمة السخيفة اللي بتقول الجواب بيبان من عنوانه..ده مش صحيح فعلاً..بس ده ميمنعش إن المظهر شئ أساسي ومش ثانوي خالص..بس جمال الروح هو الجمال الدائم..مش جمال الجسد أبداً..الجسد يزوى ويبلى..وتبقى الروح خالدة

بالنسبه لجميله...أنا مش عارفه إنتى حقيقيه ولا لأ

هي فعلاً حقيقية..بس البرنامج مش حقيقي..محض خيال..بس أكيد هي بتقرا كلامك وكلام كل أصحابنا..وبتشكر الجميع..وبتشكرني طبعاً..بس هي مش واحدة أو واحد معين..هي حقيقية جوايا..بحبها فعلاً وحاسس بيها..هي كل بنت مش جميلة ومصدومة في نفسها..يعني مش حد محدد

بالنسبة لموضوع الولد الوسيم الموضوع ده يؤكد إن الجمال لما بنعتاد عليه بيختفي..بنتعود عليه..أو مش بيدوم..لكن جمال الروح هو الدائم والمتجدد للأحسن دايماً

بس ترى الشاب اللي مش وسيم بيحقق إحتياجه لبنت تشوفه كحبيب مثلاً..للأسف..كله بيقول عاوزين حد جمال روح وجسد.. يجمع بين الأتنين..كلنا طماعين..محدش بيرضا بحاجة من غير التانية

همس الليل said...

هيا كلمه واحده
الجمال جمال الروح
والمرأه الجميله هيا الجذابه
الذكيه
الحساسه
المجنونه
القريبه من الله
بس كدا

إبراهيم محسن said...

الزعيمة داليا

شكراً لإطرائك الجميل

رديت على الرأي ده.. هو فعلاً صحيح..بس ناقصه حاجة مهمة.. إن الإنسان مش عايش لوحده..نظرة الناس ورأيهم بيحرك حاجات كتير

فعلاً الجمال الروحي المجرد من جمال الشكل مشكلة والعكس مشكلة برضه..لازم الاتنين يتجمعوا مع بعض..جميلة بنت روحها حلوة..بس للأسف روحها امتلأت بالأحقاد والشوائب النفسية بسبب إنها مش عايشة حياتها بشكل طبيعي


شكراً لكلامك الجميل..متنسينيش بقى..مش جميلة بس اللي تجمعنا يعني..أنتي مبتزورينيش خالص
سلام

إبراهيم محسن said...

سمراء النيل

لا لا لا..دي مش أول مرة تزوريني..انتي نسياني خالص..انتي زورتيني قبل كده في البوست بتاع الأحلام..نعم فلنحلم..فاكرة ولا لأ..هزعل شكلي

المرتو

اسمه مترو..قلت غلطة مطبعية بس اتكررت..غيري الحروف يا هانم..ههههههه

النت بتاعت الصومال تتأمر براحتها طالما في واحد وسيم حبها..بس بصي انتي وقعتي في الفخ..اتعاملتي مع البنت دي من خلال شكلها بس..وكنتي متغاظة منها..عارفة ليه؟ علشان متعرفيش حاجة عن روحها..صح ولا؟؟

مش هنكر اني احيانا بفكر بنفس تفكير البنت دي

انتي سمراء النيل يعني زي القمر..أوعي تفكري تفكيرها ده خالص

صاحب قريبتك في الشغل ده مش بيفكر صح معلش يعني..يعني إيه عاوز يتجوز واحدة هو بس اللي شايفها حلوة.. يعني هو بس اللي هيتعامل معاها..وهو بس اللي هيتكلم معاها..لازم الإنسان يكون معتدل في تفكيره..بس كويس..عرفت إنك أموره..انتي اللي قلتي من غير ما تاخدي بالك

نورتيني ولازم تزوريني تاني ومتنسيش انك زورتيني..هااااا..هزعل

إبراهيم محسن said...

إلى الجميع

يا جماعة أولاً متشكر لزيارتكم وحضوركم الجميل..وبجد بشكر جميلة اللي جمعتنا النهارده

يا جماعة جمال الروح والعقل حاجة أساسية جداً أوك..وحاجة مهمة جداً تمام..بس فين جمال الشكل..محدش يقول مهم مهم..لأ مهم وأساسي جداً

قال ابن المقفع
الأفكار على قارعة الطريق..الهام هو كيف تعرض تلك الأفكار

هو ده مربط الفرس..كيف أعرض تلك الأفكار..الفكرة دي زي الروح..فكرة حلوة وجميلة وتحفة..بس لو عرضتها بشكل وحش يبقى شوهتها ومحدش هيبص للفكرة..الاسلوب وحش وبالتالي الفكرة باظت

تمام لو أنا بادي لحد نصيحة..نصيحة حلوة وجميلة..بس اسلوب طرح النصيحة مش صح ووحش..حد هيعمل بالنصيحة..ولا هيقولوا عليه شخص قليل الزوق؟

زي ما كل أهالينا بيقولولنا صلوا دي نصيحة حلوة وغالية..بس اسلوب عرضها يكرهك في الصلاة..وده يخلي أغلبنا يعند وميصليش..صح ولا انا كلامي صح؟

لو فيه محل بضاعته جامدة مووت وشيك وزي الفل وكلها صناعة عالمية واسعاره مش هقولكوا عليها..بس فيه مشكلة..البترينة مش نضيفة والناس اصحاب المحل قليلي الزوق..وفيه زبالة جوا المحل..رغم ان البضاعة كويسة..حد هيشتري منه؟ ولا الكلمة التقليدية بتاعتنا..انا بتعامل مع محل وناس مش مع بضاعة
ألاقي فعلاً واحد بيقولي المحل ده اللبس فيه زي ده بالظبط بس أرخص..رغم كده باشتري من الأغلى علشان بقيس اللبس براحتي والناس زوق وبنت حلال..مين اللي بينجح في البيع أكتر..صاحب الاسلوب الأحسن ولا البضاعة الأحسن؟

لو لسه حد بيقول صاحب البضاعة الأحسن هقوله صدقني انت مش بتعرف البضاعة إذا كانت أحسن ولا لأ..لأن اسلوب عرضها غلط..عرفتوا ان جمال الشكل في أغلب الاحيان أهم من جمال الروح

على العموم ده مجرد رأي وكل الآراء صح ومحدش غلط..لأن الآراء برضه نابعة عن إحساس أصحابها بيها..وعلى العموم الحلقة الجاية من البرنامج بتتكلم في نفس القضية برضه..بس حلقة مش بتتكلم عن مجرد مشكلة لبنت..لأ مصيبة حقيقية تخص جمال الشكل..وهنعرف قريب

الشكر للجميع بجد..وانا سعيد انكوا اهتميتوا بدعوتي .. لأن فعلاً أنا كنت محتاج كلامكوا جداً..مبعرفش أعيش لوحدي

اشوفكوا مع الحلقة التانية قريب من حديث إذاعي طويل

سلام

إبراهيم محسن said...

نورااااااااااااا

يا مراحب يا مراحب منورا والبرتقان كان جامد بس السفندي مش ولا بد جايباه منين؟

انتي كلامك تمام بس ناقصه كتير وبطلي الكروتة اللي انتي فيها دي اقري الموضوع بذمة

بصي الى جانب الحاجات اللي انتي طرحتيها أنا بيعجبني أكتر البنت الخجولة...بتبقى تحفة لما وشها يحمر كده..ياااه تجنن

بيعجبني أكتر البنات المجانين..الروشين..الطقين..وخصوصاً لو بياكلوا الجمبري واللحمة نيين ويا سلام لو بيخافوا من الميه وهي بتتدلدق من الحوض..ولو كانت اسكندرانية واسمها نورا تبقى اجمل

نورتيني والفيل فرح قوي لما جيتي
على فكرة تعليقك نزل وأنا على النت بكتب الردود..وانتي نفضتيلي وادتينيش الإيميل بتاعك..ولا ضيفتيني كمان..وكانت تبقى فرصة نتكلم مع بعض والفيل يلعب شوية معاكي..على العموم براحتك
نورتيني يا قطة

heba said...

بصراحة البوست بتاعك لو كان أطول من كده كنت فضلت وراه لغاية ما خلصته للآخر عشان الحوار كان شيق جداً .. أما جميلة فهي صعبت علي عشان مفكرتش ازاي تطلع نفسها من الظلام اللي هي حاطة نفسها فيه .. طب ايه يعني لما تكون مش أمورة تلاتربع الشرق الأوسط والمصريات مش أمامير .. أي نعم لما الواحد يبقى مش جميل بتبقى عقدة نقص وحاجة توجع النفس بس لازم تشوف حل لأن موضوع انها مش جميلة ده مش هيتغير والشاب اللي كان معاها في الحفلة شكله كده خمن ان هي البنت اللي قاعدة على الترابيزة الشمال بس هو نفض عشان ميجرحهاش .. تخيل انه كان راحلها وقابلها وبعدين رفضها مش كانت تبقى انجرحت اكتر لكن دلوقت اهي بتلتمسله العذر ومفكراه مخدش باله او نسي .. المهم أنا بنصح نفسي قبل ما انصحها وبكلم نفسي فيها .. مش كل البنات جميلات والعبارة بتاعة لا يوجد بنت قبيحة دي مش صحيحة لأن في كده وفي كده في البنات زي ما في كده وفي كده في الشباب .. بكرة ربنا يرزقها باللي يحبها عشان روحها لأن لو ده حصل عمره .. عمره .. عمره ما هتفرق معاه شكلها ايه من بره

-_- said...

ياااااااااااااه

دي لسة السكة طويييييييييييييلة

انا هقراها على تلات ايام و بعدين اقول كومنت .. انا بس بحجز مكان

إبراهيم محسن said...

شمس
إيه النور ده بس؟
البلوج هيتحرق يا جماعة شمس بحالها مش كفاية سهاري صغيرة
كيفك شمس وإزي برج العقرب وبناته..البرج ده بخاف منه قوي..لدعته والقبر..رغم إن اصحاب البرج ده ميتنسوش أبداً

بصراحة أنا كنت متردد أدرج الموضوع ده ولا لأ بسبب إنه طويل جداً..بس الحمد لله فيه ناس لسه بتستحمل تقرا

مين اللي قال إن المصريات مش أمامير..أمال أنا إيه اللي تاعبني؟..بنات مصر دول حلوين من كل الجهات..ومش هتلاقي دم أخف من دمهم..عيب عليكي..بنات مصر برده جايين من رجالة وستات مصريين..يعني حضارة سبع آلاف سنة..حتشبسوت وكليوباترا

جميلة بترد عليكي وبتقولك هو فعلاً فيه بنات مش جميلات والدليل إنها موجودة..بس بتقولك متظلميش الشاب بتاع الحفلة..هو ممكن فعلاً يكون نسي المكان..هو كان راسم لي صورة معينة وأكيد حلم بيا زي ما حلمت بيه وشافني امازونية او شقراء يونانية..وميتصورش إن اللي حلم بيها تبقى دي

شكراً لحضورك الجميل

إبراهيم محسن said...

مستر شارم
متتضمنش بعد تلات أيام ممكن إيه يحصل..يمكن أمريكا تدخل مصر ويقفلوا السايبر اللي انت بتدخل عليه

على العموم مكانك محجوز تنور في أي وقت

أميرة البلطجية said...

صباح الخير يا ابراهيم
ببساطة
احلي بوست قريته من كتير اوي
احلي من احلي حاجة قريتها من مدة طويلة
مش عرفة اعلق على ايه وله ايه
اسلوبك في الكتابة اكتر من رائع ..يا ريتني زي ناس دارسة ادب ودراما عشان اعد احلل كلامك..بس كل التحليل عندي ملوش غير كلمة واحده
موهبة
انت موهوب ما شاء الله
اما الموضوع
الجمال والحب
مش عارفة اقولك ايه
بس هي كلامها صح بنسبة كبيرة اوي
وانا لو كنت مكانك مكتش حقولها رد على سؤالها بتاع ليه ربنا خلق بنات وحشة
الا بالكلام ده
ان لكل واحد..ابتلاء
ومكوتش حطول اكتر من كده ف الكلام وإلا الحلقة كانت حتقلب فلسفة ووعظ هي مش عايزة تسمعه اساسا
واقصي ما يمكن تقديمه لهذه التعيسة هو اعطائها هذه المساحة من التنفيس
ثم الدعاء لها بالهداية
وانها متسخطش على ربنا
ميرسي يا ابراهيم
اسعدتني النهاردة

إبراهيم محسن said...

أميرة اللي بتبلطج

البرنسيس البلطجية..إزي الحال؟
والله كلامك ده بيسعدني جداً..بيخليني طاير..وجمال الموضوع في جمال إحساسك انتي .. انتي اللي احساسك رقيق وكلامك جميل.. إزي عبد الحليم..يا كامل الأوصاف..سلميلي عليه ومتنسيش تسمعي كفاية نورك عليه

انتي مش محتاجة تدرسي علشان تحللي الموضوع..عملولنا إيه اللي درسوا..كفاية مجرد إحساس جميل وإنتي تبقي أحسن من ألف ناقد..إسأليني أنا..عشت أربع سنين أدرس نقد ويدرسلي نقاد..إيه الجديد..مجرد عك أسمه النقد الفني والنقد الأدبي

عاوزين نعمل مدرسة في النقد إسمها النقد عن طريق الإحساس..يعني ساعتها تبقي انتي شيخ النقاد وتبطلي بلطجة على نفسك وعلى الخلق

لو كان المذيع رد عليها وقالها إن لكل واحد إبتلاء..يبقى كده هيقتل الأمل جواها..الأمل في أن تجد من تحب ويحبها بالتغاطي عن الشكل الخارج..كان لازم يبينلها إن كل شئ في الدنيا في الحلو والوحش..وكمان شئ نسبي..لأن اللي اميرة تشوفه حلو..عبد السميع يشوفه وحش..يعني بيحاول يفهمها إن الحلو والوحش مجرد إحساس الشخص اللي شايفه

بجد إنتي اللي أسعدتيني..وعلى فكرة اسمك بيفكرني بحياة مشحونة .. بماضي مات ..أميرة البلطجية..ربنا يسهل واحكيلك على انفراد

سلام

Anonymous said...

الموضوع طويل اوي انا قريته بصعوبه بس هو جميل علي فكره هقوللك حاجه دايما دموع صح ولا ايه ياريت تبقي تشرفيني علي مدونتي

إبراهيم محسن said...

فارس
آسف إن الموضوع طويل..بس هو جه كده.. غصب عني..وشكراً لاهتمامك بقراءته

بس يا ريت تبص للتذييل بتاع البوست هتلاقي كلمة.
.Posted by إبراهيم.

متهيألي لي إن إبراهيم ده يعني مذكر

smraa alnil said...

ههههههههههههههههههههههههههههههه
ههههههههههههههههههههههههه

انا بضحك علي ردك لفارس
هههههههههههههههههههههه

عامة انا مش عايزاك تزعل
اديني جيتلك اهو تاني عشان افتكر
ههههههه
وعلي العموم انا مش قلت اني امورة دة انا كدابة
اهو انت تيجي اللقاء بتاع المدونين وتحكم براحتك
ماشي

إبراهيم محسن said...

سمرا يا سمرا

انتي نسيتي إني شفت صورتك ولا إيه؟ يعني من غير أي لقاءات عرفت الفولة واللي فيها..صحيح السمار نص الجمال

اشوفك الجمعة

بعدك على بالى said...

وستظل تفتش عنها فى كل الوجوه لأن روحها لمست قلبك كما لمستنا، وهى ستظل تبحث عن "ذلك" الذى خرج لها من دنيا الحواديت.. كانت تظنه أحد فرسان الحواديت، ولكنها اكتشفت انه ليس الا بشر يبحث عن الجمال "الزائل" فيما جمال الروح سيبقى...

عن نفسى أتصور أن تلك البائسة ستنتهى حياتها إما فى السجن أو فى إحدى المصحات النفسية، أو لعلها ستنهى حياتها بيدها فى لحظة يأس أفضل من قتل أخر ضغط بعنف على الجرح.. ربما لا تكون دميمة الى هذا الحد، ولكنها كمن أطلق شائعة وظل يرددها حتى صدقها... فلنطلب لها الرحمة والسلام النفسى

اعتذر عن الاطالة
واحييك على اسلوبك الشيق .. نجحت فى التعبير عنها وعنك بصدق .. سكنتنى الكلام ..
خالص تحياتى

الدبور said...

توضيح بخصوص البوست بتاعي اللي عمل قلق وزعل ناس مني انا بحترمهم وبحبهم
تم توضيح وجهه نظري في بوست منفرد
اقراه وقولي ليا رايك ؟
رايك يهمني

تحياتي
الدبور

إبراهيم محسن said...

بعدك على بالي

شكراً لتشريفك الجميل أولاً
اسلوب تعليقك جميل قوي..خلتيني أقراه كتير..تعليق بجد يصلح إنه يكون جزء من البوست نفسه

ممكن ينتهي مصيرها فعلاً بمأساة..بس مش ضروري تكون مأساة بهذا العنف.. ممكن تكون مأساتها مجرد دماء على جدار الحياة.. وروح معذبة تهيم في عالم الحب دون ان تجد ونيس لها في وحدتها
ربما كذلك يكون الأمر كما ذكرتي مجرد كذبة صدقتها..مكان غير مجروح.ظننته جرحاً أخذت أعبث فيه بإصبعي حتى جرح..ربما

اتشرفت بيكي فعلاً وارجو زيارات أخرى

إبراهيم محسن said...

مسيو دبور

هطير وأجيلك حالاً بس من غير قرص وحياة أبوك

Anonymous said...

موضوع الجمال ده موضوع شائك ونسبى ويختلف من ثقافه الى آخرى

جمال الروح هو اللذى تتعتمد عليه العلاقات السويه بجانب التفاهم و ... و .... و
لكن جمال الشكل بيعتمد بنسبه 70% فى اللقاء الأول
الانطباع الأول

وأنا مع كلمه لا توجد أمراه قبيحه
من قال ان الجمال بتكتسبيه بالساهل
الجمال بيساوى رجيم طيله الوقت و تعب الاعصاب على كيلو زايد وكيلو ناقص
الجمال مسكات وساعات بتضيع منك فى العنايه بالبشرة والشعر
الجمال عقد تضعينه على بلوزه قاتمه يزيدك تألقا
الجمال = الذكاء والثقه بالنفس

إبراهيم محسن said...

نبيذ

الله إيه الحاجات الجميلة دي.. كيفتيني يا نبيذ قصدي نورتيني

كلامك مظبوط جدا وخاصة موضوع اللقاء الأول ده.. بس للأسف اللقاء الأول ده دايماً بيدوم

انا بقول إن الشكل الخارجي سواء جمال شكل او اسلوب تعامل يتحكم في الانسان بنسبة 60 في الميه.. يعني حق إدارة تعاملات الإنسان.. وده دايماً

هو طبعاً الجمال مش بالساهل ابداً.. بس بخصوص الرجيم والماسكات والميك آب ده مش بتاعي ده بتاعكوا أن شاب مش شابة يا حاجة..نورتيني وتابعيني دايماً

Anonymous said...

حلو جدا الموضوع ده بس راي ان لا توجد بنات قبيحات لان الجمال نسب ممكن اشوف بنت في غايه الجمال وغيري يشوفها وحشه جدا لان ربنا عادل فعلشان كده في توازن في الحياه زهره

إبراهيم محسن said...

الأخ المجهول

مش عارف ممضتش ليه يعني عرفني بيك يا عمنا

رأيك جميل بس جميلة مش متفقة مع رأيك وبتقول ده كلام واحد ايده في الميه

ابقى امضي لما تيجي تاني

سلام

إبراهيم محسن said...

هاي زهرة

معلش مشوفتش الامضاء اصلي برضه متوقعتش ان البلوج بتاعي بيدخل عليها اطفال صغيرين يعني..نورتيني وسلميلي على نفسك قوي

متقطعيش الزيارات
سلام

بنت الحياه said...

مشكلتي الكبيرة اني لما بقرالك، بداخدني، وبانسي الامتحانات والمذاكرة :)
بس بجد القصة هايلة، السرد كالعادة عبقري، أنا شايفة ان جميلة محتاجة تصدق انها كدة فعلا، فكرتني بقصة قصيرة كتبتها من سنة، اسمها الحب الأول، قلت فيها ان الحب الأول هو حبنا لنفسنا، نفسنا اللي لو معرفناش نحبها بجد، مش هنعرف نحب ولانتحب.. جميلة محتاجة تبص جواها، وبعد ماتبص تصدق اللي شايفاه، تتصالح معاها، وتحبها.. ساعتها بس هتقدر تعرف الحب اللي بتدور عليه..

إبراهيم محسن said...

بنت الحياة

إزيك يا بنت الحاجة اللي تعبانا ومطلعا عينا بس برضه بنحبها.. سلميلي على مامتك الحياه وقوليلها واحد بيحبك بيمسي

أنا يهمني انك تركزي في امتحاناتك ومذاكرتك .. شرف كبير ليه إن كلامي ياخد ولو لحظة من وقتك .. بجد مش عارف أقولك كلامك بيسعدني قد إيه

جميلة اليومين دول بتحاول تعمل بالظبط اللي انتي بتقولي عليه.. نفسها تثق في نفسها اكتر.. ابتدت تبص حواليها لقت بنات شكلهم مش أحلى منها.. ومع ذلك بيحبوا ويتحبوا.. فقررت إنها تبص جواها وتشوف إيه الحاجة الغلط.. وربنا معاها.. بجد انا بشكرك على حضورك الرائع وتشريفك ليه.. وربنا يا رب يوفقك في دراستك وكمان مع مامتك اللي هي الحياه

سلام

shimaa said...

ummmm.."ftrt smt" ummm "ftrt smt tany"
momkn a2tklm nw ..mesh 3rfa a2olk eh bgd to7fa .."7'st elgoz2 bt3 elgmal fe 3en elr2e .el howa be3br 3n 27'tlf mfhom elgmal 3nd kol 7d..seef w shta..b7r w 3'rob" 23tkd en elgoz2 da bel7's elfkra kolha
w tool ma ana b2ra bftkr klam bahaa tahr
"إن الحب الحقيقي التقاء روحين و الارواح لا تتنافس في الجمال و لا في الذكاء لأن كل الأرواح جميلة وذكية"

-حدثني ماذا يقول جدك عن الارواح؟
يقول كل الارواح جميلة و طيبه
وهل قال لك يا سالم ما الذي ينقذ هذه الارواح ؟
نعم،قال الحب

من رواية"نقطة النور"

إبراهيم محسن said...

شيماء

منوراني يا شيماء بجد انا سعيد بوجودك قوي.. انا حظي حلو ان سعادتك تشرفيني في مدونتي المتواضعة

الجزء اللي انتي بتقولي عليه ده هو العزاء الوحيد لأي حد شايف نفسه مش جميل.. لأني متفق معاكي فعلاً أن الجمال إدراكه نسبي.. ده حقيقي.. بس مفيش اتنين بيختلفوا على ان كوندليزا رايس وحشة مثلاً
:)
هو موضوع الجمال فعلاً موضوع شائك.. بيقولوا دايماً إن الجمال نسبي.. مدرك بالإحساس لا بالعين.. بس من وقائع الحياه نقدر نقول ان القاعدة مش دايماً على صواب.. لأن الجمال زي البرفان.. هو الاسلوب والشكل وطريقة التعامل كمان.. لو انتقص الجمال في جزء بيخلي التواصل بين صاحبه والآخرين صعب شوييتن

عامة موضوع الجمال ده لسه ما انتهاش.. انتظري حلقات قادمة.. لأن الموضوع ده مش هيتحسم لو اتكلمنا فيه للأبد.. الحلقة الجاية مش عن مشكلة بنت.. بل مصيبة فتاة جميلة.. هستنى رأيك فيه

الحوار اللي انتي استشهدتي بيه ده جميل قوي.. وبيدي للحب معنى رائع وجميل.. مفتقدين احنا اليومين دول حب بجد.. بس انا أعدل شوية في السؤال وأقول

ما الذي يخلد الأرواح؟
أقول الحب

انا كاتب في بوست بكاء شادي أنه لم يمت من أحب.. لأن أرواحهم دايماً خالدة.. طالما بنحبهم وفاكرينهم

واضح بجد انك قريتي الموضوع بتمعن.. ودي حاجة تسعدني جداً.. انا سعيد بوجودك فعلاً واتمنى اني اكون عند حسن ظنك دايماً

شرفيني دايماً ومتشكر انك بتهمتمي بالدفاتر المغلقة

سلام يا جميل

hosnysoliman said...

شوف يا ابوخليل
موضوع الحلو ولوحش مش حاقلك ده موضوع نسبى ..لا ده موضوع عيون بتبص وقلب بيحس وساعةما واحد او واحدة بيبص للتانىفى نظرتين
الاولى:اشتهاء ودى ممكن نقول فيها ان مواضيع الخلو والوحش تخش فيهاودى على فكرة نصيبة على البنت الحلوة وكمان الواد لان الارتباط بيكون على اسس لاتدوم..وغالبا ما تفشل هذه العلاقة سريعا
الثانى:لما تشوف بعين القلب لما تشوف بعين القلب هنا لاتنظر الى الشكل الخارجى كثيرا ولكن الجوهر هو اللى يكون اساس الموضوع..وده يجى من الاحساس بروح الاخر ودى اقوى العلاقات

ولكن فى عموم الامر ودى القاعدةان الواحد منا لما بيشوف فهو يرى بعين من الله تضع له مقاييس الجمال يعنى الحلوة فى نظرك قد تكون بغيضة فى نظرى..ولكن لو جينا نتكلم عن مقاييس الجمال المتعارف عليهاواللى بموجبها يتم اختيار ملكات الجمال ممكن نتفق.
وبناء عليه فانى ارى ان الحل فى موضوعك ده انك تشوف لك طريقة زى طريقة الحفلة التنكرية دى علشان تحل العقدة..يعنى مثلا توجد علاقه من خلال البلوجات او التليفون وتطول هذه العلاقة دون ان يرى احدهم الاخر وفى النهاية تطلع هيا وهو فى نفس الكلية وبيشفوا بعض كل يوم لكن لا هو عارف انها هيا دى بتاعة التليفون او النت ولا هو ده هوا..والصورة الجميله التى تخيلها كل واحد منهم للاخر ليست هيا فى الواقع ذلك انه هو من وجهة نظر الشباب الحلوين ليس كذلك وهيا كمان اصلا مش حلوة لكن الموضوع مش موضوع الاشكال ولكن موضوع التقاء الارواح والقلوب
وسلام بقى يا ابوخليل

إبراهيم محسن said...

الفنان حسني سليمان

منورني بجد يا استاذ حسني وسعيد لمتابعتك لشغلي شرف عظيم ليه

طبعاً موضوع الجمال ده لعبتك.. انت راجل فنان والجمال بتاع الفنانين برده
:)

فعلاً حضرتك جبت من الآخر النظرتين موجودين بالظبط.. بس نظرة الإشتهاء دي بتاعة الشباب أكتر من البنات.. لأن شهوة الرجل في نظرته.. البنت بقى موضوعها كبير مش هرغي فيه كتير

الحل جميل لكن تقوم عليه علاقة وقتية زائلة.. أكثر من علاقة حب دائم أو زواج.. لأن مش ممكن تقوم علاقة حب دون تدخل الجسد فيها.. وكلنا نعرف أن كيوبيد إله الحب الروماني كان يرمز له بالطفل العاري طفل كرمز للحماقة لأن الحب لا يتدخل فيه العقل
أما العري فهو دليل على تدخل الجنس في الحب.. والجنس لا يقوم بين روح وروح .. علاقة الجنس تقوم بين الأجساد... ولكن أيضاً بيشترط الروح كوسيلة للتقارب النفسي.. لأن الجنس قبول نفسي بالضرورة

وحضرتك طبعاً سيد العارفين مش محتاج أتكلم في النقطة دي كتير.. أنا بس حبيت أحسم الموضوع في ردي على حضرتك لأنك فتحتلي دماغي أكتر
شكراً وبجد أسعدني وجودك

whiteangel said...

السلام عليكم

البوست ده فى منتهى الروعه والجمال
اد ايه كنت حاسه ان انا اللى بستمع وان انا اللى متصله وان انا كنت كل الناس اللى فى الاستوديو والمستمعين كلهم
حسيت نفسى اوى فى القصه دى وعيشت معاها

احساس البنت دى صعب اوى وزى ما قلت اللى ايده فى الميه مش زى اللى ايده فى النار
هى بس اللى بتعيش عذابات الليل وتقلبات النهار ومحدش بيحس بتنهداتها اللى مليانه اسى غيرها هى بس وحدها

دى حقيقه مهما حولنا نداريها بس موجوده

فيه ناس حلوين بيحسو انهم وحشين والعكس ودى بتبقى محتاجه ثقه بالنفس معقوله
بدرجه تخليك واثق من جمالك حتى لو مش جمال الشكل
كل واحد فينا فيه حاجه بتميزه عن التانى وهى اللى بتبرز علامات الجمال فيه
ومن هنا كل واحد يقدر يقول على نفسه جميل عشان هو عارف مميزاته اللى بتميزه عن باقى الناس

هى الثقه بالنفس والله اللى هتحل مشكله اى بنت فى الموقف ده
تبقى واثقه ان فيها حاجه جميله بتميزها ولو تفانت فى انها تظهر الحاجه دى بطريقه جميله وجذابه هتلاقى استحسان من كل اللى حولها ومش هيهمهم جمال الشكل
المهم جمال الروح والاخلاق والقرب من ربنا

بحييك على البوست الجميل ده
اسلوبك سلس ورائع

ربنا يوفقك وآسفه على الإطاله

السلام عليكم

صاحب البوابــة said...

لن اعلق بأى جملة سوى

احساسك رائع

وموضوعك قيم بالفعل

بصراحة ألمتني كلمات البنت

تحياتي

إبراهيم محسن said...

whiteangel

انتي اللي كلامك في منتهى الروعة والجمال وشرفتني أول زيارة وشكراً لاهتمامك بالدفاتر المغلقة

رأيك في منتهى الجمال والنضج

صحيح اننا لازم نبحث في داخلنا عن مواطن الجمال التي ربما تساعدنا على التواصل مع الحياة

ويمكن يكون جمال الجسد ضروري
بس مش كل حاجة
انا من رأيي انه من أهم الأشياء
لكنه ليس من أهمها على الاطلاق

بس رأيك جميل
وربنا يكرم الناس كلها

شرفتيني بجد
وطولي براحتك مش هييجي من طول موضوعي يعني
:)

اتمنى زيارات جميلة كتير زي دي
تحياتي

إبراهيم محسن said...

صاحب البوابة

شرفتني يا كبير
وكلامك بيحرجني مش عارف أقول أيه

شكراً واتمنى تشريفك دائماً

MerMaid said...

بوست رائع كالعادة

و تعليقات رائعة

كالعادة

رائع انت بما سطرته يداك و عبرت عنه كلماتك
===================================
و لكن يبقي السؤال ؟

ماذا تستطيع ان تفعل هي ؟؟
و نفعل نحن؟؟

انا رايي الشخصي هو

ان الله تعالي يعطينا نعم كثيرة جدا و له الحمد والشكر

و يحرمنا من أشياء

اخري ربما لو كانت لدينا لكنا استغلينا وجودها بشكل خاطئ

او حدث لنا اي شيئ سيئ بسببها

علشان كدة انا مبزعلش ابدا لما بلاقي حاجة عن حد ..الحاجة دي انا لا امتلكها
سواء كانت حاجة معنوية او مادية ..محسوسة او ملموسة

مرئية او خفية
=========================

اما عن الجمال

فكل انسان جميل بطبعه و كثيراما يغلب جمال الطبع جمال الشكل

اكيد هي موهوبة في حاجة.. كتير لا يمتلكونها
و ربنا عادل

ان الله لا يظلم مثقال ذرة

لكن هي اللي شغلت نفسها بعيب فيها حتي و لو كان عيب ناس كتير حاطاه هدف في علاقاتها و حبها وزواجها

==========
مش عارفة ان كان رايي وصل لك ولا لأ ؟

بس في الاخر

موضوع يستحق التقدير

:) :D

MerMaid